امریکہ-ایران جنگ کے درمیان خصوصی ایکسائز ڈیوٹی میں نرمی، پٹرول پر 10 روپے فی لیٹر کمی، ڈیزل ڈیوٹی فری

حکومتِ ہندو نے مغربی ایشیا میں جاری جنگ کے دوران پٹرول اور ڈیزل پر عائد خصوصی اضافی ایکسائز ڈیوٹی میں نرمی کا اعلان کیا ہے۔ وزارتِ خزانہ کی جانب سے جاری نوٹیفکیشن کے مطابق پٹرول پر خصوصی ایکسائز ڈیوٹی میں 10 روپے فی لیٹر کمی کر دی گئی ہے، جبکہ ڈیزل کو اس ڈیوٹی سے مکمل طور پر مستثنیٰ قرار دیا گیا ہے۔

سرکاری حکم نامے میں کہا گیا ہے کہ یہ تبدیلیاں مرکزی ایکسائز قواعد اور ڈیوٹی کے ڈھانچے میں ترمیم کے ذریعے نافذ کی گئی ہیں اور ان کا اطلاق فوری طور پر ہوگا۔ نوٹیفکیشن میں عوامی مفاد کا حوالہ دیتے ہوئے اس اقدام کو ضروری قرار دیا گیا ہے۔ ایوی ایشن ٹربائن فیول کے حوالے سے بھی خصوصی اضافی ایکسائز ڈیوٹی مقرر کی گئی ہے۔ حکم کے مطابق اس کی شرح 50 روپے فی لیٹر رکھی گئی ہے، تاہم مخصوص شرائط کے تحت مؤثر شرح 29.5 روپے فی لیٹر تک محدود رہے گی۔

عالمی سطح پر خام تیل کی قیمتوں میں اضافہ اور خلیجی خطے میں جاری کشیدگی کے باعث توانائی کی سپلائی متاثر ہوئی ہے۔ آبنائے ہرمز، جو عالمی تیل اور گیس کی ترسیل کا ایک اہم راستہ ہے، اس وقت دباؤ کا شکار بتایا جا رہا ہے۔

مرکزی وزیر برائے پٹرولیم و قدرتی گیس ہردیپ سنگھ پوری نے اپنے بیان میں کہا کہ گزشتہ ایک ماہ کے دوران عالمی منڈی میں خام تیل کی قیمت تقریباً 70 ڈالر فی بیرل سے بڑھ کر 122 ڈالر فی بیرل تک پہنچ گئی ہے۔ ان کے مطابق اسی مدت میں مختلف خطوں میں ایندھن کی قیمتوں میں نمایاں اضافہ دیکھا گیا، جن میں جنوب مشرقی ایشیا، شمالی امریکہ، یورپ اور افریقہ شامل ہیں۔

انہوں نے مزید کہا کہ حکومت نے تیل کمپنیوں کو درپیش نقصانات کے پیش نظر بھی اقدامات کیے ہیں۔ ان کے مطابق موجودہ حالات میں پٹرول پر تقریباً 24 روپے فی لیٹر اور ڈیزل پر 30 روپے فی لیٹر تک نقصان ریکارڈ کیا جا رہا ہے۔ وزیر نے یہ بھی بتایا کہ پٹرول اور ڈیزل کی برآمد پر ٹیکس عائد کیا گیا ہے، جس کے تحت بیرونِ ملک برآمد کرنے والی ریفائنریوں کو اضافی محصول ادا کرنا ہوگا۔