سلمان خان کے والد سلیم خان کی طبیعت ناساز، لیلاوتی اسپتال میں داخل

بالی ووڈ کے معروف اداکار سلمان خان کے والد اور مشہور اسکرین رائٹر سلیم خان کی طبیعت اچانک بگڑ گئی ہے۔ انہیں ممبئی کے لیلاوتی اسپتال میں داخل کرایا گیا ہے۔ مداح ان کی صحت کے حوالے سے کافی فکر مند ہیں اور جلد از جلد ان کی صحت یابی کے لیے دعائیں کر رہے ہیں۔ ہر کوئی یہ جاننے کے لیے بے قرار ہے کہ آخر سلیم خان کو کیا ہوا ہے۔ حالانکہ ان کی صحت کے متعلق اب تک کوئی اطلاع سامنے نہیں آئی ہے۔ اہل خانہ نے بھی اب تک کوئی آفیشل بیان جاری نہیں کیا ہے۔

سلیم خان کے اسپتال میں داخل ہونے کی وجہ سے پورا خان خاندان اس وقت پریشان ہے۔ والد سلیم خان کی طبیعت کا سنتے ہی سلمان خان دوڑے دوڑے لیلاوتی اسپتال پہنچے۔ اسپتال کے باہر سے سلمان خان کی ویڈیو سامنے آئی ہے، جن میں ان کے چہرے پر پریشانی اور فکر صاف طور پر نظر آ رہی تھی۔ سلمان خان کے علاوہ الویرا خان بھی اپنے والد سے ملنے اسپتال پہنچیں۔ حالانکہ سلیم خان صرف روٹین چیک اپ کے لیے اسپتال گئے ہیں یا کوئی سنگین بات ہے؟ اب تک اہل خانہ یا اسپتال نے اس حوالے سے کچھ بھی نہیں بتایا ہے۔

واضح رہے کہ سلیم خان نے بالی ووڈ میں اداکاری سے اپنے کیریئر کا آغاز کیا تھا، لیکن جاوید اختر سے ملاقات کے بعد وہ رائٹر بن گئے۔ سلیم خان اور جاوید اختر کی جوڑی نے اپنے قلم سے کمال کر ڈالا۔ انہوں نے بالی ووڈ کی بہت سی مشہور فلمیں لکھی ہیں، جیسے زنجیر، شولے، ڈان اور یادوں کی بارات وغیرہ۔

اگر سلیم خان کی ذاتی زندگی کی بات کریں تو وہ ابھی 90 سال کے ہیں، نومبر 1935 میں اندور میں پیدا ہوئے تھے۔ انہوں نے 1964 میں سشیلا چرک سے شادی کی تھی، جنہیں بعد میں سلمیٰ خان کا نام دیا گیا۔ اس شادی سے ان کے 4 بچے ہیں 3 بیٹے سلمان خان، ارباز خان، سہیل خان اور بیٹی الویرا خان۔ سلیم خان نے بیٹی ارپیتا کو گود لیا تھا، اس طرح وہ 5 بچوں کے والد بنے۔ سلیم خان نے دوسری شادی 1981 میں اداکارہ ہیلن سے کی  تھی۔ سلیم خان خاندان کے ساتھ ایک خوشحال زندگی گزار رہے ہیں اور خان خاندان کا شمار بالی ووڈ کے سب سے بڑے خاندانوں میں ہوتا ہے۔