پاکستان میں ہندوستانی فلموں کی سی ڈیز فروخت کرنے والے دکانداروں پر کارروائی

اسلام آباد: جموں وکشمیر کی خصوصی حیثیت کے خاتمے اور آرٹیکل 370 کی دفعات کو ختم کرنے کے بعد حکومت پاکستان کی ناراضگی بڑھتی جا رہی ہے اور اب اس نے ہندوستانی فلموں کی سی ڈیز فروخت کرنے والے دوکانداروں اور ٹیلی ویژن پر ہندوستانی مصنوعات کے اشتہارات پر پابندی عائد کردی ہے۔

وزیر اعظم عمران خان کی اطلاع پر معاون خصوصی فردوس عاشق اعوان نے کہا کہ ہم نے ہندوستانی اشتہاروں پر پابندی عائد کرنے کے ساتھ ہی ہندوستانی فلموں کی سی ڈیز فروخت کرنے والی دوکانوں کے خلاف بھی کارروائی کا آغاز کردیا ہے۔

فردوس اعوان نے جمعرات کے روز پاکستانی اخبار ڈان کو بتایا کہ وزارت داخلہ نے پہلے ہی ملک کے دارالحکومت میں ہندوستانی فلموں کے خلاف کارروائی شروع کردی ہے اور توقع کی جا رہی ہے کہ ملک کے دیگر حصوں میں بھی صوبائی حکومتوں کے تعاون سے یہ کارروائی شروع کی جائے گی۔ انہوں نے کہا کہ ’’آج وزارت داخلہ نے اسلام آباد میں کچھ دوکانوں پر چھاپہ مارکر کچھ ہندوستانی فلموں کی سی ڈیز کو ضبط کیا ہے۔‘‘

دریں اثنا پاکستان الیکٹرانک میڈیا ریگولیٹری اتھارٹی نے ٹیلی ویژن اور ریڈیو نیٹ ورکس پر ہندوستان میں تیار کی جانے والی مصنوعات کے اشتہار پر پابندی عائد کردی ہے۔

بدھ کے روز اپنے تمام ٹیلی ویژن اور ریڈیو لائسنسوں کو بھیجے گئے خط میں اتھارٹی نے یاد دلایا کہ اس نے سپریم کورٹ کی ہدایت پر گزشتہ سال اکتوبر 2018 میں ہندوستانی چینلز اور مشمولات کی نشریات پر دی گئی اجازت واپس لے لی ہے۔