ستیش کوشک موت معاملہ میں نیا انکشاف، پولیس نے فارم ہاؤس سے برآمد کیں قابل اعتراض ادویات

نئی دہلی: بالی ووڈ کے ورسٹائل اداکار و ہدایت کار ستیش کوشک کا اچانک انتقال ہو گیا۔ بتایا جا رہا تھا کہ ستیش کی موت دل کا دورہ پڑنے سے ہوئی۔ اسی دوران اس معاملے میں ایک چونکا دینے والا نیا انکشاف سامنے آیا ہے۔ دہلی پولیس ذرائع کے مطابق ستیش کوشک کی موت مشتبہ حالات میں ہوئی۔

دہلی پولیس کے ذرائع سے موصولہ اطلاع کے مطابق جب دہلی پولیس کی ٹیم نے فارم ہاؤس جا کر جانچ کی تو کچھ 'قابل اعتراض ادویات' برآمد ہوئیں۔ اس کے بعد پولیس ستیش کوشک کے تفصیلی پوسٹ مارٹم اور وسرا رپورٹ کا انتظار کر رہی ہے۔ اس کے بعد ہی پوری تصویر واضح ہو سکے گی۔

اس کے علاوہ پولیس نے ہولی پارٹی میں آنے والے مہمانوں کی فہرست بھی تیار کی ہے، جو اس وقت فارم ہاؤس میں موجود تھے۔ پولیس اس صنعت کار سے بھی پوچھ تاچھ کرنا چاہتی ہے جو ستیش کوشک کی موت کے بعد فرار ہے۔ پولیس تحقیقات میں یہ بھی جاننے کی کوشش کر رہی ہے کہ فارم ہاؤس سے ملنے والی قابل اعتراض ادویات کے پیکٹ کس کے لیے اور کیوں آئے تھے؟ کیا اس کا ستیش کویش سے کوئی رشتہ تھا؟

واضح رہے کہ ستیش کوشک دہلی میں اپنے ایک دوست کے فارم ہاؤس پر ہولی پارٹی کے لیے آئے تھے۔ اس دوران ان کی طبیعت خراب ہو گئی۔ جس کے بعد اسے اسپتال لے جایا گیا لیکن وہ دم توڑ گیا۔ ڈاکٹروں کے مطابق اداکار کی موت دل کا دورہ پڑنے سے ہوئی۔ اس ستیش کوشک کے اچانک انتقال سے پوری انڈسٹری صدمے میں ہے۔ کوئی یقین نہیں کر پا رہا ہے کہ ہمیشہ مسکراتے اور ہنستے رہنے والے ستیش کوشک اس دنیا میں نہیں رہے۔