حج کا چوتھا روز: منیٰ میں تینوں شیطانوں کو کنکریاں مارنے کی سنت ابراہیمی ادا کر رہے ہیں حجاج

آج مناسکِ حج کا چوتھا روز ہے اور حجاج کرام مِنیٰ میں تینوں جمرات کی رمی (شیطانوں کو کنکریاں مارنے کی سنت ابراہیمی) کر رہے ہیں۔رمی کے بعد حجاج دن کا بقیہ وقت مِنیٰ میں اپنے خیموں اور ٹاوروں میں ہی گزاریں گے۔ کل مناسک حج کے پانچویں اور آخری روز بھی حجاج کرام تینوں جمرات کی رمی کریں گے۔ حج کے آخری روز حجاج تینوں شیطانوں کو کنکریاں مارنے کی سنت ادا کرنے کے بعد مغرب سے پہلے منیٰ سے نکل جائیں گے اور پھر مکہ اور مدینہ میں قیام کریں گے۔

واضح رہے کہ حجاج کرام وقوف عرفات کے بعد منیٰ میں جمرات  کو تینوں شیطان کی علامات کو کنکریاں مار کر سنت ابراہیمی کی پیروی کر تے ہیں۔ جس وقت حضرت ابراہیم ؑ خواب کی تکمیل کے لیے اپنے بیٹے حضرت اسماعیل ؑ کو اللہ کی راہ میں قربان کرنے کے لیے لے جا رہے تھے تو تین مقامات پر شیطان نے انہیں بہکانے کی کوشش کی، لیکن حضرت ابراہیم ؑ نے اس کو تینوں بار کنکریاں مار کر دھتکارا تھا۔

کل حج کا آخری دن ہے جس کے بعد حجاج کی واپسی کا عمل شروع ہو جائے گا۔ اس سال 17 لاکھ سے زائد عازمین نے فریضہ حج ادا کیا ہے۔ مشرقی وسطیٰ میں  جاری تنازعہ کی وجہ اس سال حجاج اورانتظامیہ پر بھی تلوار لٹکی ہوئی تھی۔