حج 2026: سعودی عرب نے سکیورٹی اور انتظامی تیاریوں کو دی رفتار، حج کو سیاست سے دور رکھنے کا عزم

سعودی عرب نے حج 2026 کی تیاریوں کے سلسلے میں سکیورٹی، ٹرانسپورٹ اور انتظامی منصوبوں پر عمل درآمد تیز کرتے ہوئے واضح کیا ہے کہ حج کے مقدس اجتماع کو کسی بھی طرح کی سیاسی سرگرمی یا تنازعہ سے محفوظ رکھا جائے گا۔ العربیہ ڈاٹ نیٹ کی رپورٹ کے مطابق، سعودی حکام کا کہنا ہے کہ حجاج کرام کے امن، تحفظ اور سہولت کو یقینی بنانے کے لیے تمام متعلقہ ادارے مربوط حکمت عملی کے تحت کام کر رہے ہیں۔

سعودی وزیر داخلہ اور سپریم حج کمیٹی کے چیئرمین شہزادہ عبدالعزیز بن سعود نے مکہ مکرمہ میں حج سکیورٹی فورسز کی سالانہ تقریب کے دوران حج سیزن کے انتظامی اور زمینی منصوبوں کا جائزہ لیا۔ اس موقع پر سکیورٹی اداروں کی تیاریوں، ہجوم کے نظم و نسق اور جدید ٹیکنالوجی کے استعمال پر خصوصی توجہ دی گئی۔

پبلک سکیورٹی کے ڈائریکٹر اور حج سکیورٹی کمیٹی کے چیئرمین لیفٹیننٹ جنرل محمد البسامی نے کہا کہ حجاج کی خدمت کے لیے تمام دستیاب وسائل بروئے کار لائے جا رہے ہیں۔ ان کے مطابق سعودی عرب نے گذشتہ برسوں کے تجربات اور مختلف ممکنہ حالات کو سامنے رکھتے ہوئے اس سال کے منصوبے تیار کیے ہیں تاکہ مکہ مکرمہ، مدینہ منورہ، مقدس مقامات اور حجاج کے سفری راستوں پر سکیورٹی اور سہولت کو مزید مضبوط بنایا جا سکے۔

حکام کے مطابق حج سکیورٹی نظام جدید ٹیکنالوجی، کمانڈ اینڈ کنٹرول مراکز اور مربوط آپریشنل نظام سے لیس کیا گیا ہے۔ اس کے ذریعے فوری فیصلہ سازی، مختلف اداروں کے درمیان رابطے اور ہنگامی صورت حال سے نمٹنے کی صلاحیت کو مزید بہتر بنایا گیا ہے۔

سعودی حکام نے اس بات کا بھی اعادہ کیا کہ حج کو سیاست سے جوڑنے، حجاج کے امن میں خلل ڈالنے یا مناسک حج کی ادائیگی کو متاثر کرنے کی کسی بھی کوشش کو برداشت نہیں کیا جائے گا۔ حکام کا کہنا ہے کہ مقدس فریضے کی روح اور احترام کو برقرار رکھنے کے لیے ضروری اقدامات کیے جائیں گے۔

حج سکیورٹی فورسز کی سالانہ تقریب میں آپریشنل صلاحیتوں کے جائزے کے لیے فیلڈ مشقیں بھی کی گئیں۔ اس دوران جدید سکیورٹی گاڑیوں، نگرانی کے نظام اور سکیورٹی ایوی ایشن سے متعلق تیاریوں کا مظاہرہ کیا گیا تاکہ حج سیزن کے دوران فوری رد عمل اور بہتر انتظام کو یقینی بنایا جا سکے۔

ادھر مکہ مکرمہ اور مقدس مقامات کے روئل کمیشن کے جنرل ٹرانسپورٹ سینٹر میں بھی انتظامی تیاریوں کا جائزہ لیا گیا۔ حکام نے ڈیجیٹل تبدیلی کے منصوبوں، مصنوعی ذہانت پر مبنی نظام اور لائیو ڈیٹا کے استعمال کے ذریعے نقل و حمل کو مزید مؤثر بنانے کے اقدامات کا معائنہ کیا۔