اپریل ماہ میں جی ایس ٹی کلیکشن 2 لاکھ کروڑ روپے کے پار، گزشتہ سال کے مقابلے 12 فیصد کا اضافہ

ہندوستان کا جی ایس ٹی کلیکشن اپریل ماہ میں 2.10 لاکھ کروڑ روپے کی ریکارڈ سطح پر پہنچ گیا ہے۔ اس سلسلے میں مرکزی وزیر مالیات نے آج جانکاری دی۔ یہ کلیکشن گزشتہ سال اپریل ماہ کے مقابلے میں 12.4 فیصد زیادہ ہے۔ بتایا جا رہا ہے کہ گھریلو لین دین اور درآمدات میں مضبوط تیزی کی وجہ سے جی ایس ٹی کلیکشن میں اضافہ ہوا ہے۔

وزارت مالیات نے آج ایک بیان جاری کیا ہے جس میںض بتایا گیا ہے کہ جی ایس ٹی کلیکشن 2 لاکھ کروڑ روپے کے اعداد و شمار کو عبور کر گیا ہے۔ وزارت کا کہنا ہے کہ ’’جی ایس ٹی کلیکشن اپریل 2024 میں 2.10 لاکھ کروڑ روپے کی ریکارڈ سطح پر پہنچ گیا۔ یہ سالانہ بنیاد پر 12.4 فیصد کے حوصلہ بخش اضافہ کو ظاہر کرتا ہے، جو گھریلو لین دین (13.4 فیصد کا اضافہ) اور درآمدات (8.3 فیصد کا اضافہ) میں مضبوط اضافہ کے دم پر ممکن ہو پایا۔‘‘ قابل ذکر ہے کہ اپریل 2023 میں جی ایس ٹی کلیکشن 1.87 لاکھ کروڑ روپے تھا۔

بہرحال، ریفنڈ کے بعد اپریل 2.24 میں خالص جی ایس ٹی کلیکشن 1.92 لاکھ کروڑ روپے رہا، جو کہ گزشتہ سال کی اسی مدت کے مقابلے میں 17.1 فیصد کے اثردار اضافہ کو ظاہر کرتا ہے۔ اپریل میں سنٹرل جی ایس ٹی کلیکشن 43846 کروڑ روپے اور اسٹیٹ جی ایس ٹی کلیکشن 53538 کروڑ روپے رہا۔ مربوط جی ایس ٹی 99623 کروڑ روپے رہا جس میں درآمد شئے پر ملے 37826 کروڑ روپے شامل ہیں۔ ذیلی ٹیکس کلیکشن 13260 کروڑ روپے رہا جس میں درآمد شئے پر کلیکشن 1008 کروڑ روپے شامل ہیں۔

واضح رہے کہ مارچ 2024 میں جی ایس ٹی کلیکشن 1.78 لاکھ کروڑ روپے رہا تھا۔ مارچ کے جی ایس ٹی کلیکشن میں ریفنڈ کے بعد خالص جی ایس ٹی ریونیو 1.65 لاکھ کروڑ روپے رہا، جو کہ گزشتہ سال مارچ ماہ کے مقابلے میں 18 فیصد کا اضافہ ہے۔