اس سے قبل بھی ٹربولنس واقعہ کو لے کر مختلف انکشافات سامنے آ چکے ہیں۔ پہلے یہ خبر آئی کہ پائلٹ کا ڈوپ ٹیسٹ پازیٹو پایا گیا ہے، پھر یہ کہا گیا کہ پائلٹ نشے میں دھت تھا، یعنی گانجہ پی کر طیارہ اڑا رہا تھا۔ اس کے بعد جو خبر آئی اس میں یہ بتایا گیا کہ طیارے میں کئی طرح کی خامیاں تھیں۔ خبر رساں ایجنسی پی ٹی آئی نے ذرائع کے حوالہ سے بتایا کہ طیارے کا ہائیڈرولک سسٹم کم از کم 3 بار خراب ہوا تھا۔ اس کے علاوہ آٹو پائلٹ بھی بند ہو گیا تھا۔ اس کے فوراً بعد کو پائلٹ نے خود ہاتھ سے طیارے کا کنٹرول سنبھال لیا۔

رپورٹ کے مطابق طیارے کے کئی انڈیکیٹر سوئچ کچھ دیر کے لیے بند ہو گئے تھے۔ اس دوران طیارے کو ہوا میں جھٹکے بھی لگے۔ اس کے بعد طیارہ اچانک تقریباً 300 فٹ نیچے آ گیا۔ گزشتہ 4 اگست کو پیش آنے والے اس واقعے (ٹربولنس) میں 17 افراد زخمی ہو گئے تھے۔ ان میں کئی مسافر اور عملہ کے اراکین شامل تھے۔ اس واقعہ کے بعد کمپنی نے دونوں پائلٹس کو ڈیوٹی سے ہٹا دیا اور اے اے آئی بی کی جانب سے معاملے کی تحقیقات کی جا رہی ہے۔

کانگریس ذرائع کا کہنا ہے کہ اسپیکر نے حسب روایت لوک سبھا میں اپنی تقریر نہیں کی، اور نہ ہی یہ بتایا کہ پارلیمنٹ کا کام کاج کیسا رہا، اس لیے حزب اختلاف نے ان کی روایتی چائے پارٹی کا بائیکاٹ کیا ہے۔ اس سے قبل چائے پارٹی میں پرینکا گاندھی کو بھیجنے کا پروگرام تھا۔ سونیا گاندھی اور ملکارجن کھڑگے بھی چائے پارٹی میں شرکت کرنے والے تھے۔ پارلیمنٹ کا اجلاس غیر معینہ مدت کے لیے ملتوی ہونے کے بعد لوک سبھا اسپیکر کی جانب سے یہ میٹنگ رکھی جاتی ہے۔ اس کا مقصد حکمراں جماعت اور اپوزیشن کے درمیان باہمی تلخی کو کم کرنا اور خوشگوار ماحول قائم کرنا ہوتا ہے۔

اس چائے پارٹی کا جب اپوزیشن نے بائیکاٹ کیا، تو ڈی ایم کے کی طرف سے کنی موزی کا اس تقریب میں شرکت کئی لوگوں کو حیران کر رہا ہے۔ سیاسی ماہرین کنی موزی کی اس چائے پارٹی میں شرکت کو ایک بڑا سیاسی قدم بتا رہے ہیں۔ کانگریس نے تمل ناڈو میں جب ٹی وی کے سے ہاتھ ملایا، تبھی سے ڈی ایم کے نے کانگریس سے دوری بنانی شروع کر دی ہے۔ اب اس کا فائدہ حکمراں جماعت اٹھانا چاہتی ہے، اسی لیے چائے پارٹی میں کنی موزی کی تصویر پی ایم مودی کے ساتھ سامنے آنے پر کئی طرح کے سوال اٹھنے لگے ہیں۔ سوال یہ بھی اٹھ رہا ہے کہ کیا جنوبی ہندوستان میں نمائندگی کی لڑائی کو آگے بڑھاتے ہوئے ڈی ایم کے حد بندی معاملہ پر مودی حکومت کی حمایت کرے گی؟ کنی موزی کا چائے پارٹی میں شامل ہونا یہ اشارہ ضرور کرتا ہے کہ ڈی ایم کے بھلے ہی این ڈی اے کے ساتھ نہیں ہے، لیکن یہ مکمل طور پر حد بندی کے خلاف بھی نہیں ہے۔

دراصل ڈی ایم کے چاہتی ہے کہ حد بندی منصفانہ طریقے سے عمل میں آئے، تاکہ تمل ناڈو کی آواز پارلیمنٹ میں کمزور نہ ہو۔ ڈی ایم کے کو پتہ ہے کہ صرف پارلیمنٹ کے اندر ہنگامہ کرنے یا کانگریس کے ساتھ بائیکاٹ کرنے سے تمل ناڈو کے مفادات کی حفاظت نہیں ہوگی۔ اس کے لیے برسراقتدار جماعت اور لوک سبھا اسپیکر کے ساتھ گفتگو کا راستہ کھلا رکھنا بے حد ضروری ہے۔ اس سے فائدہ یہ ہوگا کہ جب حد بندی بل پارلیمنٹ میں پیش کیا جائے گا تو ریاست کے موقف کو مضبوطی کے ساتھ سامنے رکھا جا سکے گا۔

ستمبر جنوب مغربی مانسون کا آخری مہینہ ہوتا ہے۔ اسی دوران کئی ریاستوں میں خریف فصلوں کو آخری دور کی بارش ملتی ہے۔ اگر اس مہینے میں بارش معمول سے کم رہتی ہے تو کسانوں کی تشویش بڑھ سکتی ہے۔ ماہرین موسمیات بھی مسلسل نئے اعداد و شمار اور مختلف ماڈلز کی بنیاد پر مانسون کی صورتحال پر نظر رکھ رہے ہیں۔ حالیہ دنوں میں کئی موسمی ایجنسیوں نے بھی مانسون کے دوسرے حصے میں بارش کمزور پڑنے کے امکانات ظاہر کیے تھے۔ محکمۂ موسمیات (آئی ایم ڈی) نے بھی اگست اور ستمبر میں ملک کے مختلف حصوں میں معمول سے کم بارش ہونے کا امکان ظاہر کیا ہے۔ ایسے میں سبھی کی نظر ستمبر کے موسم پر ہے۔

’یورپین سینٹر فار میڈیم رینج ویدر فورکاسٹس‘ (ای سی ایم ڈبلیو ایف) کو دنیا کے سب سے قابل اعتماد موسمی ماڈلز میں شمار کیا جاتا ہے۔ یہ ماڈل سیٹلائٹ، موسمی مراکز، سمندر اور ہوا سے حاصل ہونے والے لاکھوں اعداد و شمار کا تجزیہ کر کے موسم کی پیش گوئی تیار کرتا ہے۔ اس کے تازہ ماڈل میں مغربی، وسطی اور شمالی ہندوستان کے کئی حصوں کو سب سے کم بارش والے زمرے (لوئسٹ پرسنٹائل کیٹیگری) میں رکھا گیا ہے۔ اس کا مطلب ہے کہ ان علاقوں میں معمول سے کافی کم بارش ہونے کا امکان ہے۔ ماڈل کے مطابق مہاراشٹر، گجرات، مدھیہ پردیش، راجستھان، دہلی، پنجاب، ہریانہ، چنڈی گڑھ، تلنگانہ اور آندھرا پردیش میں ستمبر کے دوران معمول سے کم بارش ہو سکتی ہے۔ اگر ایسا ہوتا ہے تو کھیتوں میں کھڑی خریف فصلوں، آبی ذخائر میں پانی کی سطح اور پینے کے پانی کی دستیابی پر اثر پڑ سکتا ہے۔

ہندوستان میں سالانہ بارش کا تقریباً 70 فیصد حصہ جنوب مغربی مانسون سے حاصل ہوتا ہے۔ ستمبر مانسون کا آخری مہینہ ہوتا ہے اور اسی وقت دھان، سویابین، کپاس، مکئی جیسی کئی خریف فصلوں کو اچھی بارش کی ضرورت ہوتی ہے۔ اگر اس مہینے بارش کم ہوتی ہے تو فصلوں کی پیداوار پر اثر پڑ سکتا ہے۔ کئی ریاستوں میں ڈیم اور آبی ذخائر بھی اسی بارش پر منحصر رہتے ہیں۔ موسمی ماہرین کا کہنا ہے کہ طویل مدتی موسمی ماڈل صرف امکانات ظاہر کرتے ہیں۔ جیسے جیسے ستمبر قریب آئے گا، نئے موسمی نظام اور تازہ اعداد و شمار کی بنیاد پر اندازے تبدیل بھی ہو سکتے ہیں۔ اس لیے فی الحال اسے ابتدائی اشارے کے طور پر دیکھا جانا چاہیے۔ ستمبر کے لیے حتمی اور زیادہ درست تصویر آنے والے دنوں میں آئی ایم ڈی اور دیگر موسمی ایجنسیوں کی نئی پیش گوئیوں سے واضح ہوگی۔

ہلدوانی ’شدھی کرن‘ معاملے پر پارلیمانی احاطے میں نامہ نگاروں سے بات کرتے ہوئے ملکارجن کھڑگے نے کہا کہ ’’ہلدوانی میں جو ہوا وہ ملک کے لیے ٹھیک نہیں ہے اور یہ ملک کو تقسیم کرنے کا کام کرتا ہے۔ اگر بی جے پی کے اصولوں پر یقین رکھنے والے لوگ مذہب کے نام پر ’شدھی کرن‘ کرتے ہیں تو یہ ملک کو برباد کرنے والے لوگ ہیں۔‘‘ ساتھ ہی انہوں نے کہا کہ ’’میں اس رویے کی سخت مذمت کرتا ہوں۔ ہلدوانی میں ’شدھی کرن‘ کرنے والے تمام لوگوں کے خلاف مقدمہ درج کیا جائے، انہیں گرفتار کیا جائے اور ان کے خلاف سخت کارروائی ہونی چاہیے۔‘‘

پارلیمانی احاطے میں نامہ نگاروں سے بات کرتے ہوئے کانگریس صدر نے یہ بھی کہا کہ ’’ہم پہلے سے کہتے آ رہے ہیں کہ اس ملک میں دلتوں کے لیے کوئی جگہ نہیں ہے۔ آخر وہاں ’ہَون‘ کی کیا ضرورت تھی؟ ہلدوانی، اتراکھنڈ کے رام لیلا میدان میں ہر پارٹی کے لوگ جلسۂ عام کرتے ہیں لیکن وہاں جو کچھ کیا گیا وہ ہندو مذہب کے خلاف ہے۔‘‘ ساتھ ہی انہوں نے کہا کہ ’’اس سے یہ بھی واضح ہوتا ہے کہ بی جے پی کے لوگ ملک کو تقسیم کرنے اور ذاتوں  کے درمیان جھگڑا کرانے کا کام کر رہے ہیں۔‘‘

دراصل ناسا چاند پر ایسے بیس بنانے کی تیاری کر رہا ہے، جہاں انسان مستقبل میں طویل عرصے تک مقیم رہ سکیں گے۔ اس کے لیے پہلے روور، روبوٹ اور دیگر آلات چاند پر بھیجے جائیں گے۔ ان چیزوں کے ذریعہ چاند کی زمین اور وہاں موجود چیزوں کے حوالے سے اطلاعات جمع کی جا سکیں گی۔ آرٹیمس مشن کے تحت ناسا انسانوں کو دوبارہ چاند پر بھیجنے کی تیاری کر رہا ہے۔ اس کے ساتھ ایسی ٹیکنالوجی تیار کی جا رہی ہے، جو مستقبل میں چاند پر طویل مشن میں کام آئے گی۔ چاند کے جنوبی قطب پر جمی برف بھی ان مشنز کے لیے کافی اہم مانی جاتی ہے۔

ہندوستان پہلے ہی چاند پر پہنچنے کی اپنی صلاحیت کا مظاہرہ کر چکا ہے۔ 2023 میں چندریان-3 نے چاند کے جنوبی قطب کے قریب کامیاب لینڈنگ کی تھی۔ اس کے ساتھ ہندوستان چاند پر سافٹ لینڈنگ کرنے والا دنیا کا چوتھا ملک بن گیا تھا۔ اس کے روور نے چاند کی سطح پر کئی تحقیقات کی تھیں۔ ہندوستان کے اپنے بھی بڑے خلائی منصوبے ہیں۔ اسپیس وژن 2047 کے تحت ہندوستان کا ہدف 2040 تک انسانوں کو چاند پر بھیجنا ہے۔ اس کے علاوہ ہندوستان اپنا ہندوستانی خلائی اسٹیشن بنانے کی تیاری کر رہا ہے۔ اس کا پہلا ماڈیول 2028 تک بھیجنے کا ہدف ہے۔

قابل ذکر ہے کہ ناسا اور اسرو کی شراکت داری نئی نہیں ہے۔ دونوں ایجنسیوں نے ’نثار‘ سیٹلائٹ مشن پر ساتھ کام کیا تھا۔ اسے جولائی 2025 میں لانچ کیا گیا تھا۔ اس کے علاوہ ہندوستانی خلائی مسافر گروپ کیپٹن شبھانشو شکلا 2025 میں ایکسیوم-4 مشن کے ذریعے انٹرنیشنل اسپیس اسٹیشن گئے تھے۔ اب مون بیس میں ساتھ کام کرنے سے ہندوستان اور امریکہ کی شراکت داری چاند کی کھوج میں بھی آگے بڑھ سکتی ہے۔

آج راجیہ سبھا کی کارروائی کے دوران ایوان میں حزب اختلاف کے قائد ملکارجن کھڑگے نے کہا کہ ’’میں اپنے درج فہرست ذات (ایس سی) یا دلت ہونے کو ایشو نہیں بناتا، لیکن ’شدھی کرن‘ واقعہ سے میری توہین کی گئی ہے۔‘‘ انھوں نے مزید کہا کہ ’’بڑی تکلیف کے ساتھ کہنا پڑتا ہے کہ میں نے ہلدوانی میں عوامی خطاب کے دوران رام لیلا میدان میں تقریر کی۔ لاکھوں لوگ وہاں موجود تھے۔ اس وقت میں نے کسی سماج یا کسی مذہب کا نام نہیں لیا، وہاں صرف لوگوں کے مسائل بیان کیے۔ لیکن میری تقریر کے بعد کل اُن لوگوں نے پوجا کر کے اس اسٹیج کی تطہیر کا کام کیا۔‘‘

کھڑگے کے اس بیان پر مرکزی وزیر جے پی نڈا نے ایوانِ بالا میں کہا کہ ’’حکومت اس عمل کی مذمت کرتی ہے اور اس کی جانچ کرائی جائے گی۔‘‘ انھوں نے واضح لفظوں میں یہ بھی کہا کہ ’’بی جے پی ایسی سرگرمیوں کی حمایت نہیں کرتی۔ میں آپ کے جذبات کی حمایت کرتا ہوں۔ ہمارے لیے بھی یہ افسوسناک ہے۔ براہ کرم بار بار یہ مت کہیے کہ ’ہم نے کیا‘۔ بی جے پی اس کی حمایت نہیں کرتی۔‘‘‘ اس پر کھڑگے نے کہا کہ ’’میں نڈا جی کا نام نہیں لے رہا ہوں۔ میں صرف یہ کہہ رہا ہوں کہ معاملہ درج کیا جائے اور جن لوگوں نے ایسا کیا ہے، انہیں گرفتار کیا جائے۔ ہمارا یہی مطالبہ ہے۔‘‘

اس معاملہ میں راجیہ سبھا کے چیئرمین سی پی رادھاکرشنن نے کہا کہ ’’اگر چھوا چھوت گناہ نہیں ہے تو اس دنیا میں کوئی گناہ نہیں ہے۔‘‘ انھوں نے یہ بھی کہا کہ ’’ہم سب اس (شدھی کرن واقعہ) کی مذمت کرتے ہیں، چاہے ہماری پارٹی کوئی بھی ہو۔ ہم سب پاک ہیں۔ جن لوگوں نے یہ کیا ہے، انہیں پکڑا جانا چاہیے۔ اس پر کوئی دو رائے نہیں ہے۔‘‘ اس دوران کھڑگے نے مطالبہ کیا کہ ہلدوانی میں جن لوگوں نے اسٹیج کا ’شدھی کرن‘ کیا، ان پر چھوا چھوت ایکٹ کے تحت کیس درج ہو اور انھیں گرفتار کر جیل بھیجا جائے۔

قابل ذکر ہے کہ ہلدوانی ریلی کے بعد ’شری رام سینا دھرمارتھ سیوا نیاس‘ کی جانب سے رام لیلا میدان میں ’شدھی کرن یگیہ‘ کرایا گیا تھا۔ تنظیم کے اراکین نے کھڑگے کو سناتن اور ہندو تنظیموں کا مخالف قرار دیتے ہوئے کہا تھا کہ جس میدان میں رام لیلا کا انعقاد ہوتا ہے، وہاں ایسے شخص کے آنے کے بعد میدان کی تطہیر کیا جانا ضروری تھا۔ اب کانگریس کے درج فہرست ذات مورچہ نے اس پورے واقعہ کو دلت مخالف ذہنیت قرار دیتے ہوئے بی جے پی کو نشانہ بنایا ہے۔ کانگریس کا الزام ہے کہ شدھی کرن یگیہ بی جے پی سے وابستہ لوگوں نے کرایا ہے۔ پارٹی لیڈران نے سوال اٹھایا ہے کہ آخر کانگریس کی ریلی کے بعد ہی رام لیلا میدان کے ’شدھی کرن‘ کی ضرورت کیوں پیش آئی؟

لوک سبھا میں آج جب کارروائی شروع ہوئی تو ابتدا میں ہی مکمل ’وندے ماترم‘ کی گونج ایوانِ زیریں میں سنائی دی۔ وزیر اعظم نریندر مودی، وزیر داخلہ امت شاہ، لوک سبھا میں قائد حزب اختلاف راہل گاندھی سمیت تمام اراکین پارلیمنٹ ’وندے ماترم‘ کے لیے کھڑے ہوئے اور ایوان میں پُرسکون انداز کے ساتھ ’وندے ماترم‘ مکمل ہوا۔ ’وندے ماترم‘ کے بعد لوک سبھا اسپیکر اوم برلا نے لوک سبھا کو غیر معینہ مدت کے لیے ملتوی کرنے کا اعلان کر دیا۔

قابل ذکر ہے کہ احتجاج، نیٹ سے متعلق بے ضابطگیوں، دہلی میں مظاہرین طلبا و نوجوانوں پر پولیس کی کارروائی اور رام مندر کے چندہ میں چوری جیسے ایشوز پر لوک سبھا کی کارروائی بار بار متاثر ہوتی رہی۔ پورے اجلاس کے دوران اپوزیشن اور حکومت کے درمیان ٹکراؤ دیکھنے کو ملا۔ ہنگاموں کی وجہ سے کچھ اہم بل لوک سبھا میں پیش نہیں کیے جا سکے۔

دوسری طرف آج راجیہ سبھا میں زبردست ہنگامہ دیکھنے کو مل رہا ہے۔ اپوزیشن کے اراکین پارلیمنٹ مسلسل نعرے بازی کر رہے ہیں۔ وہ وزیر داخلہ امت شاہ کے ایوان میں آنے کا مطالبہ کر رہے ہیں۔ عام آدمی پارٹی نے معدنیات معاملہ پر حکومت کو ہدف تنقید بناتے ہوئے کہا کہ یہ حکومت معدنیات پر قبضہ کرنا چاہتی ہے۔ حکومت کا ہر شعبے پر قبضہ کرنے کا ارادہ ہے۔ یہ سرمایہ داروں کا ساتھ دے رہی ہے۔

اس سے قبل آج پارلیمنٹ احاطہ میں بھی اپوزیشن پارٹیوں کا زبردست احتجاج دیکھنے کو ملا۔ انڈیا بلاک کے اراکین پارلیمنٹ 20 جولائی کو طلبا پر ہوئی کارروائی اور رام مندر کے چندہ میں چوری کے معاملے پر وزیر داخلہ امت شاہ سے بیان کا مطالبہ کرتے ہوئے مظاہرہ کر رہے تھے۔ یہ احتجاجی مظاہرہ صبح تقریباً 10.30 بجے ’مکر دروازہ‘ کے سامنے کیا گیا۔

کمیٹی نے کہا ہے کہ امتحانات کے انعقاد جیسے حساس کام کے لیے کافی تعداد میں مستقل ملازمین کا ہونا ضروری ہے۔ سی بی ایس ای میں بڑی تعداد میں عہدے خالی ہونے کی وجہ سے موجودہ ملازمین پر اضافی ذمہ داری پڑ رہی ہے۔ دوسری جانب کنٹریکٹ پر کام کرنے والے ملازمین پر انحصار بڑھ رہا ہے۔ کمیٹی نے خبردار کیا ہے کہ امتحانات سے متعلق خفیہ کاموں میں ایسا انتظام پریشانیوں میں اضافہ کر سکتا ہے۔ اس لیے بورڈ میں کافی تعداد میں مستقل افرادی قوت دستیاب کرانے کی ضرورت ہے۔

سی بی ایس ای کے امتحانی نظام میں سوالیہ پرچے، امتحانات کا انعقاد اور دیگر طریقۂ کار انتہائی حساس تصور کیے جاتے ہیں۔ کمیٹی کا زور اسی بات پر ہے کہ ایسے کاموں کو سنبھالنے کے لیے کافی تعداد میں مستقل ملازمین ہونے چاہئیں۔ شعبے میں تقریباً 44 فیصد عہدے خالی ہونے کی صورت میں کنٹریکٹ ملازمین کا کردار بڑھنا امتحانی نظام کے لیے چیلنج بن سکتا ہے۔ کمیٹی نے اشارہ دیا ہے کہ امتحانات کی ساکھ برقرار رکھنے کے لیے افرادی قوت کی کمی دور کرنا ضروری ہے۔

اسٹیمیٹس کمیٹی (تخمینہ کمیٹی) نے ملک میں کفایتی اور معیاری تعلیم سے متعلق اپنی رپورٹ میں صرف امتحانی نظام کا مسئلہ نہیں اٹھایا ہے۔ کمیٹی نے قومی تعلیمی پالیسی یعنی ’این ای پی-2020‘ کے نفاذ کو لے کر بھی تشویش ظاہر کی ہے۔ رپورٹ کے مطابق این ای پی نافذ ہونے کے باوجود 10 ویں سے 12 ویں جماعت میں کئی مقامات پر طلباء کو پرانی کتابوں سے پڑھایا جا رہا ہے۔ کمیٹی کا کہنا ہے کہ این ای پی کے مطابق نصاب اور کتابوں میں ضروری تبدیلیاں نہ ہونے کی وجہ سے طلبہ پر پڑھائی کا دباؤ بڑھ رہا ہے۔

رپورٹ میں امتحانی نظام کو محفوظ اور قابل اعتماد بنانے کے لیے مستقل ملازمین کی مناسب تعداد یقینی بنانے پر زور دیا گیا ہے۔ امتحانی شعبے میں خالی عہدوں کو پر کرنا اور حساس کاموں کے لیے مستقل افرادی قوت بڑھانا اہم قرار دیا گیا ہے۔ اس کے ساتھ ہی تعلیمی نظام میں این ای پی کے مطابق نصاب اور کتابوں میں تبدیلی بھی ضروری ہے۔ ایسے میں سی بی ایس ای کے سامنے امتحانات کی شفافیت برقرار رکھنے کے ساتھ ساتھ ملازمین کی کمی دور کرنے اور تعلیمی نظام کو نئی پالیسی کے مطابق ڈھالنے کا چیلنج ہے۔

قابل ذکر ہے کہ دہلی کے لال قلعہ بم دھماکہ کی تحقیقات قومی تحقیقاتی ایجنسی (این آئی اے) کر رہی ہے۔ مئی میں این آئی اے کی جانب سے داخل کی گئی چارج شیٹ میں بھی یہ دعویٰ کیا گیا تھا کہ القاعدہ سے وابستہ ایک شاخ کے ایک ملزم نے ’ٹیرر انجینئرنگ‘ کے لیے مصنوعی ذہانت (اے آئی) کا غلط استعمال کیا تھا۔ اس وقت کہا گیا تھا کہ ملزمین نے راکٹ امپرووائزڈ ایکسپلوسیو ڈیوائس (آئی ای ڈی) تیار کیے تھے اور جموں و کشمیر کے اننت ناگ ضلع کے قاضی گنڈ جنگل میں اس کی ٹیسٹنگ بھی کی گئی تھی۔

این آئی اے کی جانب سے رواں سال 14 مئی کو بم دھماکہ کے معاملے میں 7,500 صفحات پر مشتمل طویل چارج شیٹ داخل کی گئی۔ گزشتہ سال 10 نومبر کو دہلی میں ہوئے زبردست آئی ای ڈی کار دھماکہ کے سلسلے میں داخل اس چارج شیٹ میں بتایا گیا کہ ملزمین نے آئی ای ڈی بنانے اور استعمال کرنے کے لیے انتہائی باریک بینی سے ’لیبارٹری گریڈ‘ طریقہ اپنایا تھا۔ چارج شیٹ میں نامزد ملزمین میں سے ایک ’انصار غزوات الہند‘ (اے جی یو ایچ) کے عبوری دہشت گرد ماڈیول کا ’اِن ہاؤس انجینئر‘ نکلا اور یہ ماڈیول اے کیو آئی ایس سے وابستہ ہے۔ وزارت داخلہ اے کیو آئی ایس اور اس کی تمام شاخوں کو دہشت گرد تنظیم قرار دے چکی ہے۔ چارج شیٹ میں یہ بات بھی سامنے آئی کہ ملزم یاسر بلال وانی نے اس واقعہ کو انجام دینے کے لیے ’تکنیکی مدد‘ فراہم کرنے کے ارادے سے 25-2024 کے دوران 2 سے 3 بار ہریانہ کے فرید آباد میں الفلاح یونیورسٹی کیمپس کا دورہ کیا اور کچھ عرصہ وہاں رہا بھی۔

تحقیقات میں یہ سامنے آنے کے بعد کہ یونیورسٹی میں کام کرنے والے 3 ڈاکٹر بھی مبینہ طور پر دھماکہ میں ملوث تھے، یونیورسٹی کا کردار بھی قانون نافذ کرنے والی ایجنسیوں کی تحقیقات کے دائرے میں آ گیا۔ ڈاکٹر عدیل احمد راتھر نے یاسر کی ملاقات ڈاکٹر عمر ان نبی سے کرائی تھی۔ ڈاکٹر عمر ان نبی اس معاملے کا ایک اور اہم ملزم ہے اور اسی نے دھماکہ خیز مواد سے بھری کار چلائی تھی۔ چارج شیٹ کے مطابق اس دھماکہ میں 11 افراد ہلاک ہوئے جبکہ کئی دیگر زخمی ہو گئے تھے۔

این آئی اے کی تحقیقات سے یہ بات بھی سامنے آئی کہ عدیل نے یاسر کو آئی ای ڈی بنانے کا سامان، مثلاً این پی کے کھاد کی شکل میں پوٹاشیم نائٹریٹ اور پسی ہوئی چینی فراہم کرنے میں اہم کردار ادا کیا تھا۔ ڈاکٹر عمر پر الزام ہے کہ انہوں نے امپرووائزڈ راکٹ آئی ای ڈی پر تحقیق کی اور اس بارے میں مزید معلومات فراہم کیں۔ ساتھ ہی چارج شیٹ میں یہ بات سامنے آئی ہے کہ یاسر نے یوٹیوب اور چیٹ جی پی ٹی کا بھی استعمال کیا اور اس کے ذریعہ یہ جاننے کی کوشش کی تھی کہ ’راکٹ کیسے بنایا جائے اور اس میں مکسچر کا کتنا تناسب ہونا چاہیے‘۔ اس سے ’ٹیرر انجینئرنگ‘ کے لیے ڈیجیٹل اور اے آئی پلیٹ فارم کے مبینہ غلط استعمال کی معلومات سامنے آئی تھیں۔ یاسر نے ڈاکٹر عمر، ڈاکٹر مزمل شکیل اور دیگر شریک ملزمین کے ساتھ مل کر راکٹ آئی ای ڈی تیار کیے اور قاضی گنڈ جا کر وہاں کے جنگل میں ان کا تجربہ بھی کیا۔