میڈیا رپورٹس کے مطابق نانا پاٹیکر کی میت رات 10.30 بجے کے بعد فارم ہاؤس میں اس جگہ لائی گئی جہاں آخری رسومات ادا ہونی تھیں۔ آنجہانی اداکار کی میت ترنگے میں لپٹی ہوئی تھی اور اس کے ساتھ مارچنگ بینڈ بھی موجود تھا۔ میت کو ’چِتا‘ پر رکھا گیا تاکہ وہاں موجود لوگ آخری بار ان کا دیدار کر سکیں اور انہیں خراج عقیدت پیش کر سکیں۔ اس دوران بھیڑ میں ’نانا پاٹیکر امر رہیں!‘ کے نعرے گونجتے رہے۔ انہیں بندوق کی گولیوں سے 3 بار سلامی بھی دی گئی۔

نانا پاٹیکر کی آخری رسومات میں کئی فلمی و سیاسی ہستیوں کی شرکت دیکھنے کو ملی، جن میں جیکی شراف، ساجد ناڈیاڈوالا، انل شرما، مہاراشٹر کے وزیر اعلیٰ دیویندر فڑنویس اور نائب وزیر اعلیٰ ایکناتھ شندے بھی شامل تھے۔ یہ سبھی اداکار کو خراج عقیدت پیش کرنے کے لیے ان کے آبائی گاؤں پہنچے تھے۔ وزیر اعلیٰ فڑنویس نے پونے میں نانا پاٹیکر کی میت کا آخری دیدار کیا، پھولوں کی چادر چڑھائی اور انہیں جذباتی خراج عقیدت پیش کیا۔ انھوں نے نانا کے بیٹے اور اہلیہ سے ملاقات کر کے غم کی اس گھڑی میں ان سے تعزیت کا اظہار بھی کیا۔

قابل ذکر ہے کہ نانا پاٹیکر کے انتقال سے پورے ملک کو گہرا صدمہ پہنچا ہے۔ جمعرات کو مرحوم اداکار کے ہزاروں مداح ان کے آخری دیدار کے لیے پونے واقع ان کے فارم ہاؤس پر جمع ہو گئے۔ ہزاروں کی تعداد میں لوگوں نے اداکار کا آخری دیدار کیا۔ اس دوران کئی لوگوں نے نانا کے بڑے بڑے پوسٹر اٹھا کر انہیں آخری وداعی دی۔ آخری رسومات کے بعد نانا پاٹیکر کے بیٹے ملہار پاٹیکر نے میڈیا کو بتایا کہ اہل خانہ نے ان کی موت کے دن ہی آخری رسومات ادا کرنے کا فیصلہ کیوں کیا۔ خبر رساں ایجنسی اے این آئی کی ایک ویڈیو میں ملہار سے جمعرات کی دیر رات آخری رسومات ادا کرنے کے بارے میں سوال کیا گیا، تو انہوں نے بتایا کہ ’’ہم نے آج ہی آخری رسومات ادا کرنے کا فیصلہ اس لیے کیا، کیونکہ ان کا انتقال صبح ہی ہو گیا تھا اور کافی وقت گزر چکا تھا۔ اسی لیے ہم نے آج ہی آخری رسومات ادا کرنے کا فیصلہ کیا۔‘‘

اس درمیان نانا پاٹیکر کی موت کے معاملہ میں گوا پولیس نے طبی و قانونی طور پر غیر فطری موت کا معاملہ درج کر کے تحقیقات شروع کردی ہیں۔ یہ معاملہ ’بھارتیہ ناگرک سرکشا سنہتا‘ (بی این ایس ایس) کی دفعہ 194 کے تحت درج کیا گیا ہے۔ اس معاملے کی تحقیقات پی ایس آئی نتن نائک کررہے ہیں۔ موصولہ اطلاع کے مطابق نانا پاٹیکر کو گوا کے ڈونا پاؤلا میں واقع ان کی رہائش گاہ سے منی پال اسپتال لے جایا گیا تھا، جہاں ڈاکٹروں نے انہیں مردہ قرار دے دیا۔ ابتدائی اطلاعات میں ان کی موت کی وجہ کارڈیک اریسٹ بتائی گئی ہے۔ تاہم، موت کے حالات اور اس کی صحیح وجہ کا پتہ لگانے کے لیے پولیس قانونی کارروائی مکمل کر رہی ہے۔

تحقیقات کے تحت پولیس نے پنچ نامہ اور دیگر ضروری قانونی کارروائیاں مکمل کر لیں۔ نانا پاٹیکر کی میت کا پوسٹ مارٹم گوا میڈیکل کالج (جی ایم سی) میں کیا گیا۔ اب اہل خانہ اور واقعے سے متعلق دیگر افراد کے بیانات بھی درج کیے جائیں گے۔ تحقیقات کا مقصد موت کی وجہ اور اس سے متعلق حالات کی تصدیق کرنا ہے۔ اگر تحقیقات میں موت قدرتی پائی جاتی ہے اور کسی مشتبہ صورت حال کا پتہ نہیں چلتا، تو ضابطے کے مطابق معاملہ بند کیا جاسکتا ہے۔

مغربی بنگال کی نندی گرام اور ریجی نگر اسمبلی نشستوں کے ضمنی انتخابات کے نتائج سے ریاست کے موجودہ سیاسی رجحان کا اندازہ ملنے کا امکان ہے، جہاں بی جے پی نے 15 سال سے اقتدار میں رہی ترنمول کانگریس کو ہٹا کر حکومت بنائی ہے۔ منگل (6 اکتوبر) کو ہوئے دونوں ضمنی انتخابات اگرچہ 4 ماہ پرانی بی جے پی حکومت پر عوامی رائے شماری نہیں ہیں، لیکن اپوزیشن سے اقتدار میں آنے کے بعد پارٹی کی انتخابی طاقت کا اندازہ لگانے اور اپوزیشن خیمے کی صورت حال کا جائزہ لینے کے لیے ان نتائج پر گہری نظر رکھی جائے گی۔

نندی گرام کی سیاسی اہمیت

نندی گرام کی سیاسی اہمیت پہلے سے ہی کافی زیادہ رہی ہے۔ 2021 کے اسمبلی انتخابات میں سویندو ادھیکاری نے اس نشست پر ممتا بنرجی کو شکست دی تھی۔ 2026 کے اسمبلی انتخابات میں بھی سویندو ادھیکاری نے نندی گرام سے جیت درج کی، لیکن بھوانی پور نشست اپنے پاس رکھنے کی وجہ سے نندی گرام کی نشست خالی ہو گئی اور یہاں ضمنی انتخاب کرانا پڑا۔ ریجی نگر میں پولیس کے ساتھ تصادم کے بعد عام جنتا انّین پارٹی کے سربراہ ہمایوں کبیر کو گرفتار کر لیا گیا۔ وہیں کانگریس نے دونوں اسمبلی حلقوں میں دوبارہ پولنگ کرانے کا مطالبہ کیا۔ یہاں عام جنتا انّین پارٹی کے سربراہ ہمایوں کبیر کے بیٹے غلام نبی آزاد انتخابی میدان میں ہیں۔

الیکشن کمیشن کے مطابق، دونوں انتخابی حلقوں کے تقریباً 5.24 لاکھ ووٹرز میں سے تقریباً 80 فیصد نے ووٹ ڈالے۔ نندی گرام میں 80.89 فیصد اور ریجی نگر میں 80.08 فیصد پولنگ درج کی گئی۔ تاہم، ووٹنگ کے دوران ووٹروں کو ڈرانے دھمکانے، بوتھ کی سطح پر بے ضابطگیوں اور کہیں کہیں تصادم کے الزامات بھی لگائے گئے۔

تمل ناڈو میں ٹی وی کے کا پہلا بڑا امتحان

تمل ناڈو میں مدورانتکم اور دھاراپورم اسمبلی نشستوں کے ضمنی انتخابات کے ووٹوں کی گنتی جمعہ کو 3 سطحی حفاظتی حصار کے درمیان کی جائے گی۔ مئی میں ٹی وی کے کے اقتدار میں آنے کے بعد ہوئے ان اہم ضمنی انتخابات کو اس کی مقبولیت کا امتحان مانا جا رہا ہے، جبکہ اپوزیشن پارٹی اے آئی اے ڈی ایم کے کو امید ہے کہ وہ اپریل کے اسمبلی انتخابات میں ٹی وی کے سے ہاری ہوئی نشستیں دوبارہ حاصل کر لے گی۔

ووٹوں کی گنتی تروپور ضلع کے دھاراپورم میں واقع ایل آر جی گورنمنٹ آرٹس اینڈ سائنس کالج اور مدورانتکم کے لیے چنگل پٹو ضلع کے آتھور میں واقع انٹیگریٹیڈ سوشل ڈیولپمنٹ ٹریننگ سینٹر میں ہوگی۔ دھاراپورم کے گنتی مرکز میں ای وی ایم کے ووٹوں کی گنتی کے لیے 14 میزیں اور پوسٹل بیلٹ کی کارروائی کے لیے 2 میزیں لگائی گئی ہیں۔ مدورانتکم میں بھی اسی طرح کے انتظامات کیے گئے ہیں۔ شفاف طریقے سے گنتی کو یقینی بنانے کے لیے دونوں مراکز پر 3 سطحی سخت حفاظتی انتظامات کیے گئے ہیں۔

آسام کی ناگاؤں نشست پر سخت مقابلہ

آسام کی ناگاؤں لوک سبھا نشست پر بی جے پی، کانگریس اور اے آئی یو ڈی ایف کے درمیان سخت مقابلہ ہے۔ بی جے پی نے سابق نوکرشاہ دیواشییش شرما کو امیدوار بنایا ہے، جبکہ کانگریس کی جانب سے سابق رکن اسمبلی شیو منی بورا اور اے آئی یو ڈی ایف کی جانب سے پارٹی سربراہ بدرالدین اجمل انتخابی میدان میں ہیں۔ ناگاؤں میں تقریباً 76 فیصد ووٹرز نے اپنے حق رائے دہی کا استعمال کیا تھا۔ کانگریس کے رکن پارلیمنٹ پردیوت بوردولوئی کے اسمبلی انتخابات لڑنے اور جیتنے کے بعد یہ نشست خالی ہوئی تھی۔