ہندوستان کو عالمی کپ میں ملا چھٹا مقام

بھونیشور: ہاكی عالمی کپ میں 43 سال کے طویل وقفے کے بعد ٹائٹل جیتنے کا خواب ٹوٹنے کے بعد میزبان ہندستان کو اس ٹورنامنٹ میں چھٹا مقام حاصل ہوا ہے۔ ہندستان کو گزشتہ عالمی کپ میں نواں مقام حاصل ہوا تھا۔

ہندستان کو کوارٹر فائنل میں کل ہالینڈ کے ہاتھوں 1-2 سے شکست کا سامنا کرنا پڑا تھا۔ اس ہار کے ساتھ ہندستانی ٹیم سیمی فائنل میں پہنچنے سے چوک گئی۔

ٹورنامنٹ میں اب ہفتہ کو دونوں سیمی فائنل کھیلے جائیں گے جس میں انگلینڈ کا مقابلہ دنیا کی تیسرے نمبر کی ٹیم اور اولمپک سلور فاتح بیلجئیم سے ہوگا جبکہ دوسرے سیمی فائنل میں گزشتہ دو بار کی چمپئن اور دنیا کی نمبر ایک ٹیم آسٹریلیا کا سامنا ہالینڈ سے ہوگا۔
اتوار کو کانسی اور طلائی تمغہ کے مقابلے کھیلے جائیں گے۔ کوارٹر فائنل میں ہارنے والی ٹیموں جرمنی کو پانچویں، میزبان ہندستان کو چھٹا، ارجنٹائن کو ساتواں اور فرانس کو آٹھواں مقام حاصل ہوا۔

کراس اوور میں باہر ہوئی ٹیموں میں نیوزی لینڈ کو نواں ، چین کو 10 واں، کینیڈا کو 11 واں اور پاکستان کو 12 واں مقام حاصل ہوا۔ گروپ مرحلے میں باہر ہوئی ٹیموں میں ا سپین کو 13 واں، آئر لینڈ کو 14 واں، ملائیشیا کو 15 واں اور جنوبی افریقہ کو 16 واں مقام حاصل ہوا۔

ایونٹ کا پہلا سیمی فائنل سنیچر کو انگلینڈ اور بیلجئم کے درمیان کھیلا جائے گا، جبکہ آسٹریلیا اورہالینڈ کی ٹیمیں آمنے سامنے ہوں گی۔واضح رہے کہ ورلڈ کپ ہاکی کا فائنل اتوار 16 دسمبر کو کھیلا جائے گا۔