آدم خوری اور قتل کے مجرم کو عمر قید کی سزا

جرمن دارالحکومت برلن کی ایک عدالت نے آدم خوری یا انسانی گوشت کھانے کے عزائم کے تحت ایک شخص کو قتل کرنے کے جرم میں ایک استاد کو عمر قید کی سزا سنا دی ہے۔

یہ ظالمانہ کارروائی ستمبر سن 2020 کے بعد کئی ماہ تک جرمن ذرائع ابلاغ کی شہ سرخیوں کی زینت بنی رہی تھی۔ عدالت کی جانب سے جمعہ سات جنوری کو سنائے گئے فیصلے کے بعد مذکورہ مجرم کے لیے اپنی باقی کی زندگی کے دوران جیل سے رہا ہونا تقریباﹰ ناممکن ہوگیا ہے۔

عدالتی فیصلے کے مطابق اشٹیفان آر نامی شخص قتل کرنے اور مقتول کے جسم کی باقیات کو نقصان پہنچانے کا مرتکب قرار پایا ہے۔ واضح رہے جرمنی میں نجی معلومات مخفی رکھنے کے قوانین کے تحت مجرم کا پورا نام نہیں بتایا گیا اور متاثرہ شخص کی شناخت بھی ظاہر نہیں کی گئی۔

عدالت کے مطابق اشٹیفان آر نے انسانی گوشت کھانے کے شوق کو پورا کرنے کے لیے یہ قتل کیا تھا۔ جج نے سماعت کے بعد فیصلہ سناتے ہوئے کہا، ''جو تم نے کیا ہے، وہ ایک غیر انسانی عمل ہے۔‘‘

جرمنی میں عمر قید کی مدت کم از کم پندرہ سال ہوتی ہے، جس کے بعد قیدی عام طور پر پیرول کی درخواست دے سکتا ہے۔ اس مقدمے میں چونکہ صوبائی عدالت نے اسے ایک سنگین نوعیت کا جرم قرار دیا ہے، لہٰذا اشٹیفان آر کو پندرہ برس قید کے بعد بھی رہا نہیں کیا جاسکتا۔

اشٹیفان آر پر برلن میں چھ ستمبر سن 2020 کو ایک 43 سالہ شخص کو قتل کرنے کا مجرم قرار دیا گیا ہے۔ قاتل اور مقتول کی ملاقات ایک آن لائن ڈیٹنگ ویب سائٹ کے پلیٹ فارم کے ذریعے طے پائی تھی۔ دونوں نے اشٹیفان آر کے اپارٹمنٹ میں جنسی عمل کے لیے ملاقات کا فیصلہ کیا تھا۔

استغاثہ کے مطابق 42 سالہ استاد نے متاثرہ شخص کو پھر نشہ آور دوا پلا کر بے ہوش کر دیا۔ اشٹیفان آر نے پھر مذکورہ شخص کی گردن کاٹ دی اور اس کے جنسی اعضاء کو کھانے کی نیت سے جسم سے الگ کر دیا۔ بعد ازاں قاتل نے نعش کے ٹکڑے ٹکڑے کر دیے اور اسے برلن کے پانکو نامی علاقے میں چھپا دیا۔

قتل کے بعد کئی ہفتے گزر جانے کے بعد پولیس کو اس علاقے سے انسانی جسم کے اعضا ملے تھے، جو کہ مذکورہ 43 سالہ لاپتہ شخص کے تھے۔

اس واقعے کی تفتیش کے دوران ملنے والے شواہد کے ذریعے پولیس نے اشٹیفان آر کے اپارٹمنٹ کا پتہ لگایا، جہاں انہیں متاثرہ شخص کے باقی اعضاء، خون اور قتل کے لیے استعمال کردہ آلات بھی مل گئے۔ مجرم نے عدالتی کارروائی کے دوران زیادہ تر خاموشی اختیار کر رکھی تھی۔ اس نے تاہم جرم کے ارتکاب سے انکار کیا تھا۔