پی ایم مودی پر تلخ ہوتے جا رہے ہیں پرینکا گاندھی کے حملے

کچھ دن قبل ہی پرینکا گاندھی نے مودی کا موازنہ کورووں کے نسل سے تعلق رکھنے والے ’دُریودھن‘ سے کی تھی جسے اس کے غرور کے لیے جانا جاتا تھا۔ اس کے علاوہ انھوں نے وزیر اعظم کو اسکول کا وہ بچہ بتایا جو ناکام ہونے کے بعد بہانے تلاش کرتا ہے۔ اتر پردیش کے پرتاپ گڑھ میں جہاں پی ایم مودی نے ان کے والد پر تبصرہ کیا تھا، وہیں ایک ریلی کے دوران جمعرات کو پرینکا نے مودی پر تلخ حملہ کرتے ہوئے انھیں ’بزدل اور کمزور پی ایم‘ کہہ دیا۔ انھوں نے کہا کہ ’’میں نے اس سے بڑا بزدل اور کمزور پی ایم نہیں دیکھا‘‘۔

پرینکا گاندھی نے اپنی تقریر میں پی ایم مودی کو تنقید کا نشانہ بناتے ہوئے یہاں تک کہہ دیا کہ ’’سیاسی طاقت بڑے ٹی وی اشتہارات کے ذریعہ سے حاصل نہیں ہوتے، یہ تب ملتی ہے جب شخص اس بات کو مانتا ہے کہ کسی بھی کرسی سے بڑی عوام ہے۔ شخص میں عوام کی پریشانیوں کو سننے کا، انھیں دور کرنے کا اور اپنی تنقید برداشت کرنے کی ہمت ہونی چاہیے۔ یہ پی ایم نہ ہی آپ لوگوں کو سنتے ہیں اور نہ ہی آپ کے سوالوں کا جواب دیتے ہیں۔‘‘

دہلی میں اپنے روڈ شو کے دوران بدھ کو بھی پرینکا گاندھی نے پی ایم مودی کو تنقید کا نشانہ بناتے ہوئے یہ چیلنج دیا تھا کہ ووٹنگ کے آخری دو مراحل میں وہ جی ایس ٹی، نوٹ بندی، خاتون کی سیکورٹی اور نوجوانوں سے کیے گئے وعدوں کے ایشوز پر انتخاب لڑ کر دکھائیں۔ انھوں نے پی ایم کے ذریعہ کانگریس حکومتوں پر کیے گئے حملے کے جواب میں کہا کہ ’’ان کی حالت اسکول کے اس بچے کی طرح ہے جو کبھی اپنا ہوم ورک نہیں کرتا۔ جب ٹیچر اس سے پوچھتے ہیں تو وہ کہتا ہے کہ نہرو جی نے میرا پیپر لے کر اسے چھپا لیا اور اندرا جی نے کاغذ کی کشتی بنا کر اسے پانی میں بہا دیا۔‘‘

دہلی سے اپنا رشتہ بتاتے ہوئے پرینکا نے شمال مشرقی دہلی میں اپنے روڈ شو میں جو تقریر کی وہ بھی قابل تعریف رہی۔ انھوں نے کہا کہ وہ دہلی میں پیدا ہوئی ہیں، یہاں کی گلی گلی سے واقف ہیں، لیکن مودی جی کو یہاں صرف پانچ سال ہوئے ہیں اور وہ نہیں جانتے کہ یہاں کی عوام کیا چاہتی ہے۔ انھوں نے کہا کہ مودی جی نے پانچ سالوں میں جو بھی جھوٹے وعدے کیے ہیں، اس کا جواب ووٹرس انھیں مناسب طریقے سے دیں گے۔

انبالہ کی ایک ریلی میں منگل کو پرینکا گاندھی نے جو کچھ کہا وہ بھی سن لیجیے۔ انھوں نے اپنی تقریر میں کہا کہ ’’بی جے پی اور مودی جی کا غرور دُریودھن جیسا ہے۔‘‘ وہ مزید کہتی ہیں کہ ’’اس ملک نے کبھی مغروروں کو معاف نہیں کیا۔ تاریخ اس بات کی گواہ ہے کہ دریودھن میں اتنا غرور تھا کہ جب بھگوان کرشن اسے سمجھانے آئے تو اس نے انھیں قیدی بنانا چاہا۔‘‘

ہندی شاعری رام دھاری سنگھ دنکر کی لائنوں کا حوالہ دیتے ہوئے بھی پرینکا گاندھی نے پی ایم مودی کو تنقید کا نشانہ بنایا۔ انھوں نے کہا کہ ’’رام دھاری سنگھ دنکر نے لکھا تھا کہ جب انسان بربادی کی طرف بڑھتا ہے تو سب سے پہلے وہ جس چیز سے محروم ہوتا ہے وہ صحیح اور غلط کے درمیان فرق کرنے کی تمیز ہے۔‘‘