پاکستان میں کورونا کے معاملوں میں اضافہ، پیر کو وزرائے تعلیم اور صحت کا اجلاس

اسلام آباد: پاکستان میں کووڈ-19 کی پانچویں لہر کے درمیان وبائی مرض کے پھیلاؤ کو روکنے کے لیے پیر کو صوبائی وزیر تعلیم اور صحت کا اجلاس طلب کیا گیا ہے۔

نیشنل کمانڈ آپریشنل سینٹر (این سی او سی ) کے ایک بیان کے مطابق میٹنگ میں نان فارماسیوٹیکل انٹروینشن (این پی آئی ) کے نئے سیٹ اپ پر تبادلہ خیال کیا جائے گا جس میں سمجھا جاتا ہے کہ تعلیم کے شعبے، عوامی تقریبات، شادی بیاہ کی تقریبات، انڈور/آؤٹ ڈور ڈائننگ اور ٹرانسپورٹ سیکٹر پر توجہ دی جائے گی۔

قبل ازیں این سی او سی میٹنگ میں ملک میں بالخصوص شہری علاقوں میں کورونا وائرس کے بڑھتے ہوئے کیسز کے پیش نظر وبائی مرض کے چارٹ کے اعداد و شمار، بیماری کے پھیلاؤ اور مجوزہ این پی آئی پر تبادلہ خیال کیا گیا۔ اجلاس میں ضروری احتیاطی تدابیر کے تحت صوبائی حکومتوں بالخصوص سندھ حکومت کے ساتھ بڑے پیمانے پر کوآرڈینیشن کرنے کا فیصلہ کیا گیا۔

این سی او سی کے اجلاس میں 17 جنوری سے فلائٹ میں کھانا/ناشتہ پیش کرنے پر مکمل پابندی عائد کرنے کا فیصلہ بھی کیا گیا۔ قبل ازیں سول ایوی ایشن اتھارٹی سے کہا گیا تھا کہ وہ پرواز میں ماسک پہننے کو یقینی بنائے اور تمام ہوائی اڈوں پر ایس او پیز پر عمل درآمد کرے۔ اس نے ایس او پی کی خلاف ورزی کرنے والوں کے خلاف سخت کارروائی کرنے اور خاص طور پر ماسک پہننے اور ویکسینیشن کے لازمی نظام کے نفاذ کو یقینی بنانے کے لیے بھی کہا۔

اس کے علاوہ ویکسی نیشن مہم کو تیز کرنے اور ویکسی نیشن کے اہداف کے حصول کے لیے کوششیں تیز کرنے کی بھی ہدایات دی گئی ہیں۔ صحت کے ایک اہلکار نے بتایا کہ لیب ٹسٹ میں ایک مقامی شخص کے اومیکرون ویرینٹ سے متاثر ہونے کی تصدیق ہوئی ہے۔