پاکستان: چینی سفارتخانہ کے پاس گولی باری میں 2 پولس اہلکار اور 3 دہشت گرد ہلاک

پاکستان کے شہر کراچی میں چینی سفارتخانہ کے پاس جمعہ کے روز گولی باری ہوئی اور کچھ دھماکوں کی آوازیں بھی سنی گئیں۔ عینی شاہدین کے مطابق صبح تقریباً 9.30 بجے کچھ لوگ ہاتھوں میں گرینیڈ اور اسلحہ لیے ہوئے تھے اور چینی سفارتخانہ کے پاس فائرنگ کر رہے تھے۔ سفارتخانہ کے سبھی افسران محفوظ ہیں لیکن اس حملے میں دو سیکورٹی اہلکار کے مرنے کی خبریں موصول ہو رہی ہیں۔

’جیو نیوز‘ کی خبروں کے مطابق حملہ آور چینی سفارتخانہ میں گھسنے کی کوشش کر رہے تھے۔ اس معاملے میں پولس کا کہنا ہے کہ تین حملہ آوروں کو مار دیا گیا ہے اور ان کا ’سوسائڈ جیکٹ‘ بھی قبضے میں لے لیا گیا ہے۔ سفارتخانہ میں اور اس کے آس پاس رینجرس نے کلیرنس کی کارروائی بھی شروع کر دی گئی ہے۔

’ڈان‘ کی رپورٹ کے مطابق شروعاتی رپورٹوں سے پتہ چلتا ہے کہ سیکورٹی اہلکار اور نامعلوم حملہ آوروں کے درمیان گولی باری کے بعد کلفٹن علاقے میں کثیر تعداد میں پولس فورس کے ساتھ ساتھ پاکستانی رینجرس کو بھی تعینات کر دیا گیا ہے۔

ادھر پاکستان کے وزیراعظم عمران خان نے چینی قونصل خانے پر حملے کو پاک چین اقتصادی راہداری (سی پیک) کے خلاف سازش قرار دیتے ہوئے کہا ہے کہ سی پیک منصوبے کو ناکام بنانے کی تمام تر کوششوں کو ناکام بنایا جائے گا۔ عمران خان نے حملے کی مکمل تحقیقات کی ہدایت کرتے ہوئے اس کے پیچھے چھپے عناصر کو بے نقاب کرنے کا حکم دیا ہے۔