امریکہ کی صورت حال افغانستان سے بھی بدتر ہو گئی ہے: ڈونالڈ ٹرمپ

واشنگٹن: امریکہ کے صدر ڈونالڈ ٹرمپ نے امریکہ میں ہو رہے مظاہروں پر اپنی مایوسی کا اظہار کرتے ہوئے کہا ہے کہ ان مظاہروں کے سبب امریکہ کی صورتحال افغانستان سے بھی بدتر ہوگئی ہے۔ ساتھ ہی انھوں نے یہ بھی کہا ہے کہ جو بائیڈن کا جیتنا ملک کو دوزخ میں دھکیلنے کے مترادف ہوگا، اس لئے ریپبلکنز امریکہ کو دوزخ میں دھکیلنے کی کوششیں ناکام بنادیں گے۔

امریکی صدر ٹرمپ نے امریکہ میں نسل پرستی کے خلاف ہو رہے مظاہروں پر ناراضگی کا اظہار کرتے ہوئے کہا کہ "نسل پرستی کے خلاف احتجاج کرنے والوں کو کچلنے کے لئے اہم شہروں میں قانون نافذ کرنے والے اہلکار بھیجے جائیں گے۔ پورٹ لینڈ اور اوریگن میں اہلکاروں کو بغیر وردی کے تعینات کیا جائے گا اور وہ سادہ گاڑیوں میں گشت کریں گے۔"

مظاہروں کے تعلق سے امریکی صدر کا کہنا تھاکہ یہ مظاہرے ان ریاستوں میں کئے جارہے ہیں جہاں لبرل ڈیموکریٹس اقتدار میں ہیں۔ ان مقامات پر صورتحال افغانستان سے بھی زیادہ خراب ہے۔ انہوں نے مزید کہا کہ مظاہروں کے نام پر افراتفری پھیلانے والے امریکہ سے نفرت کرتے ہیں۔ نوبت یہ ہے کہ ریاستوں میں گورنر، میئر اور سنیٹرز بھی ان سے ڈرتے ہیں۔