سری لنکا میں کووڈ-19 کی نئی شکل پائی گئی

ابھی کورونا کی دوسری لہر پوری طرح ختم بھی نہیں ہوئی ہےاور تیسری لہر کی باتیں شروع ہوگئی ہیں لیکن اس بیچ ہندوستان کے پڑوسی ملک سری لنکا سے ایک ایسی خبر آئی ہے جس نے بے چینی میں اضافہ کر دیا ہے۔ سری لنکا کے حکام نے جمعرات کے روز کہا کہ دارالحکومت کولمبو میں پہلی بار ہندوستان میں پائے جانے والے B.1.617.2 وائرس کی ایک نئی شکل کا پتہ چلا ہے۔

سری جے ورددھنے پورہ یونیورسٹی کے شعبہ امیونولوجی اور مالکیولر میڈیسن کی ڈائریکٹر ڈاکٹر چندیما جیونندرا نے بتایا کہ کولمبو کے ڈیماتگوڑہ علاقے سے پانچ نمونوں میں کورونا کی نئی شکل کا پتہ چلا ہے۔

انہوں نے کہا کہ اس سے قبل سری لنکا میں دو مریضوں میں اس نئی شکل کا پتہ چلا تھا ، لیکن یہ قرنطینہ مراکز اور کسی بھی سوسائٹی میں نہیں پایا گیا تھا۔ سائنس دانوں کا کہنا ہے کہ یہ ڈیلٹا ویرئنٹ الفا اسٹرین سے زیادہ ں تیزی سے پھیل رہا ہے۔ اس نئے ویرئنٹ کو لے کر خوف بڑھ گیا ہے۔

صحت کے حکام نے بتایا کہ پچھلے دو ماہ کے دوران ایک لاکھ سے زیادہ نئے متاثرین کی اطلاع ملی ہے۔قرنطینہ مراکز اور ملک کے بہت سے علاقوں میں کووڈ ۔19 کے نئے ڈیلٹا اور الفا اسٹرین کا پتہ چلا ہے۔