مالدیپ کے وزیر ماحولیات علی صالح پر قاتلانہ حملہ، حملہ آور گرفتار

مالدیپ کے وزیر ماحولیات علی صالح پر قاتلانہ حملہ کیے جانے کی خبریں سامنے آ رہی ہیں۔ میڈیا رپورٹس کے مطابق یہ حملہ ان پر پیر کی دوپہر کیا گیا تھا جس کی ویڈیو منظر عام پر آئی ہے۔ مالدیپ کی راجدھانی مالے کے شمال میں سڑک پر ایک شخص نے ان پر چاقو سے حملہ کیا، لیکن علی صالح اپنی جان بچا کر بھاگنے میں کامیاب ہو گئے۔ اس حملہ میں علی صالح کے بائیں ہاتھ میں چوٹیں آئی ہیں۔

بتایا جاتا ہے کہ علی صالح پر یہ قاتلانہ حملہ اس وقت ہوا جب وہ ہلہملے میں ایک سڑک پر اپنی اسکوٹی سے کہیں جا رہے تھے۔ حملہ آور نے وزیر کے گلے کے پاس تیز دھار والے اسلحہ سے حملہ کیا، حالانکہ وہ کسی طرح اس حملے میں بچ گئے اور اسکوٹی چھوڑ کر بھاگ گئے۔ اس واقعہ کے بعد حملہ آور شخص کو پولیس نے گرفتار کر لیا اور اسے 15 روزہ ریمانڈ پر بھیج دیا گیا ہے۔ موصولہ اطلاعات کے مطابق حملہ آور کی عمر 43 سال ہے اور یہ غالباً وہی شخص ہے جس کو گزشتہ جولائی ماہ میں پولیس نے اس وقت گرفتار کیا تھا جب وہ دہشت گرد تنظیم اسلامک اسٹیٹ کے لوگو والا کپڑا پہن کر مسجد میں گھسا تھا۔ بعد ازاں اسے رِہا بھی کر دیا گیا تھا۔ بہر حال، زخمی وزیر ماحولیات علی صالح کو فوری طور پر قریبی اسپتال میں علاج کے لیے داخل کرا دیا گیا۔