بنگلہ دیش میں کورونا متاثرین کی تعداد بڑھ کر 15691

بنگلہ دیش میں گزشتہ 24 گھنٹوں کے دوران کورونا وائرس (کووڈ۔19) کے ریکارڈ 1034 نئے معاملے سامنے آنے کے بعد متاثرین کی تعداد بڑھ کر 15691 ہو گئی اور 11 مزید لوگوں کی موت کے بعد مرنے والوں کی تعداد 239 ہو گئی ہے۔

صحت ڈائریکٹوریٹ کی ایڈیشنل ڈائریکٹر جنرل پروفیسر نسیمہ سلطانہ نے پیر کو باقاعدہ صحت بلیٹن جاری کرتے ہوئے یہ اطلاع دی۔ انہوں نے بتایا کہ اس دوران 7208 نمونوں کی جانچ کی گئی جن میں سے 1034 لوگوں کی رپورٹ پوزیٹیو پائی گئی۔ انہوں نے بتایا کہ اس دوران 252 متاثرہ مریض صحت مند ہوئے جس کے بعد صحت مند لوگوں کی تعداد بڑھ کر 2902 ہو گئی۔

بنگلہ دیش میں گزشتہ آٹھ مارچ کو کورونا وائرس کے پہلے تین معاملے سامنے آئے تھے۔ بنگلہ دیش میں بھی کورونا متاثرین کی تعداد میں اضافہ کا رجحان ہے اور اس بات کے امکان ہیں کہ وہاں اس میں مزید اضافہ ہوگا۔

عالمی وبا کا پھیلاؤچین کے صوبے ہوبئی کے دارالحکومت ووہان شہر سے شروع ہوا تھا۔ عالمی ادارہ صحت نے 11 مارچ کو کورونا وائرس بحران کو وبا قرار دیا تھا۔

پوری دنیا میں پھیل چکے اس وبا سے اب تک دو لاکھ 84 ہزار سے زائد افراد ہلاک ہو چکے ہیں اور قریب 42 لاکھ لوگ اس سے متاثر ہوئے ہیں۔ اس وائرس سے متاثرین 15 لاکھ سے زیادہ لوگ صحت مند بھی ہوئے ہیں۔