افغانستان میں طالبان کے آٹھ کمانڈروں کی رہائی

کابل: افغان حکومت نے پیر کو صوبہ قندھار سے جنگجو تنظیم طالبان کے 8 کمانڈروں کو رہا کر دیا۔ یہ اطلاع دفتر صوبائی گورنر کے ترجمان نے دی۔ گورنر کے دفتر سے جاری بیان کے مطابق حکومت افغانستان اور طالبان کے مابین معاہدے کے تحت 400 جنگجووں کو رہائی کے مطالبہ کے بعد ان کمانڈروں کو رہا کیا گیا ہے۔

رہا کئے گئے کچھ جنگجووں کو لوگوں اور سیکورٹی فورسز کو ہلاک کرنے کے الزام میں سزائے موت سنائی گئی تھی۔ افغان حکومت اور طالبان امن معاہدے کی تکمیل کے مقصد سے طالبان لڑاکوں کو آہستہ آہستہ رہا کیا جا رہا ہے۔ واضح رہے کہ طالبان نے افغان حکومت سے یہ شرط رکھی تھی کہ مذاکرات کا آغاز اس وقت تک نہیں کیا جائے گا جب تک اس کے 400 جنگجووں کو رہا نہیں کیا جاتا۔

خیال رہے کہ کابل اور طالبان امن مذاکرات شروع کرنے کے مقصد سے اعتماد سازی کے اقدام کے طور پر قیدیوں کی ایک مرحلہ وار رہائی میں مصروف عمل ہیں۔ تاہم، پہلے افغان حکومت کی جانب سے طالبان قیدیوں کی رہائی سے انکار اور اس کے بعد طالبان کے افغان سکیورٹی فورسز مخالف حملوں کی وجہ سے قیدیوں کی وہ رہائی تاحال عمل میں نہیں لائی جا سکی تھی جو طالبان حکومت، افغانستان اور امریکہ کے بیچ ہونے والے امن معاہدے کے تحت طے پائی گئی تھی۔