یوگی راج میں عصمت دری کی شکار کو نہیں ملا انصاف، مایوسی میں کر لی خودکشی

اتر پردیش میں وزیر اعلیٰ یوگی آدتیہ ناتھ کی پولس سے جب انصاف نہیں ملا تو گونڈا کے کرنل گنج کوتوالی علاقہ میں عصمت دری متاثرہ خاتون نے پھانسی لگا کر خودکشی کر لی۔ متاثرہ خاتون نے اگست 2018 میں پولس میں شکایت درج کرائی تھی۔ خاتون کے شوہر کا کہنا ہے کہ گاؤں کے دو لوگوں نے ان کی بیوی کے ساتھ عصمت دری کی تھی۔ انھوں نے بتایا کہ اس بات کی شکایت انھوں نے پولس میں کی تھی لیکن کوئی فوری قدم نہیں اٹھایا گیا۔ ان کا الزام ہے کہ شکایت کے باوجود ملزمین کے خلاف پولس نے کوئی کارروائی نہیں کی۔ ان کا کہنا ہے کہ پولس جانچ کا یقین دلا کر معاملے کو ٹالتی رہی۔

14 جنوری کو خودکشی کرنے والی خاتون کے شوہر نے انصاف کی تلاش میں بیوی کے ساتھ لکھنؤ جانے کی بات بھی کہی۔ انھوں نے بتایا کہ وہ 6 مہینے تک دوڑتے رہے لیکن انھیں انصاف نہیں ملا۔ انھوں نے مزید کہا کہ ان کی بیوی پہلے سے ہی کہہ رہی تھی کہ اگر انصاف نہیں ملا تو وہ خودکشی کر لے گی۔

خودکشی کے بعد اس سلسلے میں پولس کا بیان بھی سامنےا ٓیا ہے۔ اس کا کہنا ہے کہ حال ہی میں متاثرہ کے ذریعہ دو بار شکایت کیے جانے کے بعد ضلع کے ایڈیشنل سپرنٹنڈنٹ آف پولس کو معاملے کی جانچ سونپی گئی تھی لیکن اسی درمیان متاثرہ خاتون نے خودکشی کر لی۔ بتایا جا رہا ہے کہ جس پولس کو خاتون کو انصاف دلانا تھا، اس نے اس معاملے میں دو بار فائنل رپورٹ پیش کر دی تھی۔ اُدھر اعلیٰ افسران کا کہنا ہے کہ اس معاملے میں دو انسپکٹروں کو معطل کر دیا گیا ہے اور کرنل گنج کے داروغہ کو بھی لائن حاضر کیا گیا ہے۔