اہم خبریں LIVE: وومنس ٹی-20 عالمی کپ کے دلچسپ سیمی فائنل میں ہندوستان کی 5 رنوں سے شکست، آسٹریلیا فائنل میں

وومنس ٹی-20 عالمی کپ کا سیمی فائنل میچ آج ہندوستان اور آسٹریلیا کے درمیان کھیلا گیا۔ اس دلچسپ مقابلے میں 5 رنوں سے جیت حاصل کر آسٹریلیا فائنل میں پہنچ گئی ہے۔ ایک وقت ہندوستان جیت کی طرف قدم بڑھاتا ہوا دکھائی دے رہا تھا، لیکن کپتان ہرمن پریت کور (52 رن) کے رَن آؤٹ ہونے کے بعد حالات کافی بدل گئے اور آخر میں 5 رنوں سے ہندوستانی ٹیم کو شکست ملی۔ ٹاس جیت کر پہلے بلے بازی کرتے ہوئے آسٹریلیائی خاتون ٹیم نے 20 اوور میں 4 وکٹ کے نقصان پر 172 رن بنائے۔ 173 رنوں کے ہدف کا پیچھا کرنے اتری ہندوستانی ٹیم کے 3 کھلاڑی حالانکہ جلدی جلدی آؤٹ ہو گئے تھے، لیکن رَن ریٹ اچھا رہا اور کپتان ہرمن پریت کے ساتھ جیما روڈرگز نے 24 گیندوں پر تیز طرار 43 رن بنا کر حالات ہندوستان کے حق میں کر دیے تھے۔ آخری اوور میں ہندوستان کو جیت کے لیے 16 رن بنانے تھے لیکن 10 رن ہی بن سکے۔ 20 اوور میں ہندوستانی خاتون ٹیم نے 8 وکٹ کے نقصان پر 167 رن بنائے۔

مغربی بنگال میں جمعرات کو ایک بڑا ریل حادثہ ہوتے ہوتے ٹل گیا۔ ہوڑہ-امتا لوکل ٹرین کے 3 ڈبے ماجو ریلوے ہالٹ کے پاس پٹری سے اتر گئے۔ واقعہ کے بعد سنتراگاچھی سے راحتی ٹرین کے ساتھ جنوب شمالی ریلوے کے افسران جائے حادثہ پر پہنچے۔ اچھی بات یہ ہے کہ اس حادثہ میں کسی بھی ہلاکت کی خبر سامنے نہیں آئی ہے۔

کناگریس جنرل سکریٹری جئے رام رمیش نے رائے پور میں ایک پریس کانفرنس کے دوران پون کھیڑا معاملے پر کہا کہ ملک میں بولنے کی آزاد ہے ہی نہیں، بلکہ بولنے کے بعد کی آزادی بھی خطرے میں ہے۔ انھوں نے کہا کہ مودی حکومت کانگریس کنونشن کو ناکام بنانے کی بے کار کوشش کر رہی ہے۔ جئے رام رمیش کا کہنا ہے کہ ’’پہلے کانگریس لیڈروں کے گھر پر چھاپہ ماری کی جاتی ہے اور آج پون کھیڑا کے ساتھ جو ہوا اس سے صاف ہے کہ مودی حکومت ہر قیمت پر کانگریس کنونشن کو ناکام بنانا چاہتی ہے۔‘‘

شیوسینا کے ادھو ٹھاکرے دھڑے کے رکن پارلیمنٹ سنجے راوت نے کہا ’’وہ بڑی خبر بنانا چاہتے تھے، اس لیے انہوں نے پون کھیڑا کو گرفتار کر لیا۔ اس کے علاوہ چھتیس گڑھ میں کانگریس کے اجلاس سے 24 گھنٹے پہلے، سی ایم کے قریبی ساتھیوں اور کانگریس لیڈروں پر ای ڈی اور سی بی آئی نے چھاپے مارے۔ وہ اپوزیشن جماعتوں کا گلا گھونٹ رہے ہیں۔ یہ صرف ایمرجنسی ہے۔‘‘

کانگریس ترجمان پون کھیڑا کو سپریم کورٹ سے راحت دی گئی ہے۔ سپریم کورٹ نے آئندہ منگل تک ان کی گرفتاری پر روک لگاتے ہوئے ان کے خلاف درج کی گئی تمام ایف آئی آرز کو یکجا کرنے کے معاملہ پر آسام پولیس اور یوپی پولیس کو نوٹس جاری کیا ہے۔

کانگریس لیڈر آر ایس سرجے والا نے کہا ’’ہیمنت بسوا سرما خود کو وفادار ثابت کرنے کی کوشش کر رہے ہیں۔ پون کھیڑا کے خلاف فرضی ایف آئی آر درج کی گئی ہے۔ انہوں نے کیا جرم کیا ہے؟ ہم سچائی کے لئے لڑیں گے اور وہ ہمیں خاموش نہیں کر پائیں گے۔ ہم اسے قانونی طور پر لڑیں گے۔‘‘

سپریم کورٹ نے کانگریس لیڈر پون کھیڑا کی گرفتاری سے متعلق عرضی پر سماعت شروع کر دی ہے۔ سینئر ایڈوکیٹ ابھیشیک منو سنگھوی نے کھیڑا کے لئے عبوری راحت اور ملک بھر میں ان کے خلاف درج کرائی گئی ایف آئی آرز کو یکجا کرنے کا مطالبہ کیا۔

ادھر، آسام پولیس کی جانب سے پیش ہونے والے وکیل نے سپریم کورٹ میں کہا کہ انہیں گرفتار کیا گیا ہے اور ٹرانزٹ ریمانڈ کے لئے عدالت میں پیش کیا جائے گا۔

کانگریس ترجمان پون کھیڑا کی گرفتار کے خلاف سپریم کورٹ میں عرضی داخل کی گئی ہے۔ اے این آئی نے خبر دی ہے کہ سپریم کورٹ نے اس معاملہ پر سماعت کے لئے رضامندی ظاہر کر دی ہے۔ سپریم کورٹ آج سہ پہر 3 بجے معاملہ پر سماعت کرے گا۔

دریں اثنا، پون کھیڑا نے اپنی گرفتار کے بعد کہا ’’یہ ایک لمبی لڑائی ہے اور میں لڑنے کے لئے تیار ہوں۔‘‘

آسام پولیس کی طرف سے کانگریس لیڈر پون کھیڑا کو گرفتار کئے جانے کے بعد دہلی کی عدالت میں پیش کیا جائے گا، جہاں سے ٹرانزٹ ریمانڈ حاصل کی جائے گی۔ اس کے بعد انہیں آسام لے جایا جائے گا۔

کانگریس لیڈر پون کھیڑا کو دہلی ایئرپورٹ پر پرواز میں سوار ہونے سے روکے جانے اور انہیں گرفتار کئے جانے پر چھتیس گڑھ کے وزیر اعلیٰ بھوپیش بگھیل نے کہا کہ ایک طرف مرکزی حکومت ریاست میں ہمیں پریشان کر رہی ہے کہ ہم کنونشن کا انعقاد صحیح طرح سے نہ کر پائیں اور اس کے لیے چھاپے مارے جا رہے ہیں۔ ہمارے کارکنوں کے گھروں پر چھاپہ ماری کی گئی۔ کل پھر 3 دفاتر پر چھاپہ مارا گیا۔ دوسری طرف کانگریس کے ہمارے لیڈروں کو یہاں آنے سے روکا جا رہا ہے۔ پون کھیڑا کو طیارے سے اتارنے کا مطلب ہے کہ بی جے پی کانگریس کے کنونشن سے خوفزدہ ہے۔‘‘

کانگریس کنونشن میں شرکت کے لئے رائے پور جا رہے پارٹی ترجمان پون کھیڑا کو دہلی پولیس کی جانب سے پرواز سے اتارے جانے کے بعد ان کی گرفتار کی تصدیق کر دی گئی ہے۔ آسام پولیس کا کہنا ہے کہ اس کی درخواست پر دہلی پولیس نے اس کارروائی کو انجام دیا ہے۔ آسام پولیس کے ترجمان نے کہا کہ پون کھیڑا کے خلاف آسام کے ہاف لونگ پولیس تھانہ میں مقدمہ درج کیا گیا اسی سلسلہ میں انہیں گرفتار کیا گیا ہے۔

کانگریس کے جنرل سکریٹری شعبہ مواصلات جے رام رمیش نے کہا ’’پہلے ای ڈی ھے رائے پور میں چھاپہ ماری کی، اب پون کھیڑا کو دہلی پولیس کی جانب سے رائے پور کے طیارے سے اتارا گیا ہے۔ تاناشاہی کا دوسرا نام ’امت شاہی’ ہے! مودی حکومت ہمارے قومی کنونشن میں رخنہ ڈالنا چاہتی ہے۔ ہم ڈرنے والے نہیں ہیں، ملک کے باشندگان کے لئے جدوجہد کرتے رہیں گے۔‘‘

کانگریس لیڈر پون کھیڑا نے کہا ’’مجھے بتایا گیا کہ آپ کے سامان میں کچھ مسئلہ ہے، جبکہ میرے پاس صرف ایک ہینڈ بیگ ہے۔ فلائٹ سے اترے تو بتایا گیا کہ آپ نہیں جا سکتے۔ پھر کہا گیا- ڈی سی پی آپ سے ملیں گے۔ میں کافی عرصے سے انتظار کر رہا ہوں۔ اصولوں، قوانین اور وجوہات کا کوئی سراغ نہیں!‘‘

کانگریس کنونشن میں شرکت کے لئے جا رہے پارٹی کے ترجمان پون کھیڑا کو طیارے سے نیچے اتارے جارنے پر کانگریس نے سخت رد عمل ظاہر کیا ہے۔ پارٹی لیڈڑ رندیپ سرجے والا نے کہا ’’کانگریس کے ساتھیوں کے ساتھ ہم سب جنرل اسمبلی کے لیے انڈیگو کی فلائٹ سے رائے پور جا رہے تھے، ہمارے ساتھی پون کھیڑا کو طیارے سے اتار دیا گیا اور اب آسام پولیس آ گئی ہے۔ یہ کیسی آمریت ہے؟ امن و امان کے نام پر کسی ایک آدمی کی من مانی قابل قبول نہیں۔ ہم سب سچ کے سپاہی ہیں، حق کے لیے لڑیں گے۔‘‘