اہم خبریں: یوپی ٹیٹ گھوٹالہ میں پوری دال ہی کالی ہے... پرینکا گاندھی

یوپی ٹیٹ گھوٹالہ معاملہ میں کانگریس جنرل سکریٹری پرینکا گاندھی نے بی جے پی حکومت کو تنقید کا نشانہ بنایا ہے۔ حملہ آور انداز میں انھوں نے ایک ٹوئٹ کیا ہے جس میں لکھا ہے ’’یوپی ٹیٹ گھوٹالے میں دال میں کچھ کالا ہی نہیں، پوری دال ہی کالی ہے۔ پیپر چھاپنے کا ٹھیکہ دینے سے لے کر امتحان کے مینجمنٹ تک، ہر قدم پر بدعنوانی کی گئی۔ اتر پردیش حکومت پوری طرح سے بدعنوان اور نوجوان مخالف ہے۔‘‘

طویل علالت کے بعد سینئر صحافی ونود دُوا کا آج انتقال ہو گیا۔ وہ گزشتہ کئی دنوں سے اسپتال میں زیر علاج تھے۔ ان کی بیٹی ملکا دُوا نے انتقال کی تصدیق کی ہے۔ انھوں نے بتایا کہ ونود دُوا کے جسد خاکی کی آخری رسومات اتوار یعنی 5 دسمبر کو ادا کی جائیں گی۔

کسان لیڈر راکیش ٹکیت نے اطلاع دی ہے کہ سنیوکت کسان مورچہ نے حکومت سے بات کرنے کے لئے ایک 5 رکنی کمیٹی تشکیل دی ہے۔ اس کمیٹی کو حکومت سے بات کرنے کا اختیار ہوگا۔ اس کمیٹی میں بلبیر سنگھ راجے وال، شیو کمار ککا، گرنام سنگھ چڑھونی، یدھویر سنگھ اور اشوک دھوالے شامل ہیں۔

نیوزی لینڈ کے گیندباز اعجاز پٹیل کے 10 وکٹ حاصل کرنے کے بعد ہندوستانی گیندبازوں نے بھی شاندار کارکردگی کا مظاہر کرتے ہوئے مہمان ٹیم کو محض 62 رنوں پر آل آؤٹ کر دیا۔ آر اشون نے 4 جبکہ محمد سراج نے 3 وکٹ حاصل کئے۔ نیوزی لینڈ اب ہندوستان سے 263 رن پیچھے ہے۔

وزیر اعظم نریندر مودی اتراکھنڈ کے دور پر ہیں۔ یہاں انہوں نے راجدھانی دہرادون میں تقریباً 18,000 کروڑ روپے کے متعدد پروجیکٹوں کا افتتاح کیا اور سنگ بنیاد رکھا۔ اس موقع پر وزیر اعظم مودی نے کہا، ’’گزشتہ 5 سالوں کے دوران مرکز نے اتراکھنڈ کی ترقی کے لئے ایک لاکھ کروڑ روپے سے زیادہ منظور کئے ہیں۔ آج کے ترقیاتی پروجیکٹوں میں 18 ہزار کروڑ روپے سے زیادہ کی سرمایہ کاری کی گئی ہے۔

کورونا متاثرین کو انصاف دلانے کے لئے کانگریس پارٹی کی جانب سے تحریک کی شروعات کی گئی ہے۔ کانگریس لیڈران ٹوئٹر ہیش ٹیگ ’اسپیک اپ فار کووڈ نیائے‘ چلا کر اس معاملہ میں حکومت سے مختلف مطالبات کر رہے ہیں۔ کانگریس کے سابق صدر راہل گاندھی نے ٹوئٹ کیا، ’’جب بھی عوام درد اور نقصان میں ہوتی ہے، حکومت ہند سو رہی ہوتی ہے۔‘‘ انہوں نے عوام سے ‘کووڈ نیائے‘ کے لئے آواز اٹھانے کی اپیل کی۔

بی سی سی آئی نے ہندوستانی کرکٹ ٹیم کا جنوبی افریقہ کا دورے کورونا کے نئے ویرینٹ اومیکرون کے خطرے کے پیش نظر ملتوی کر دیا ہے۔ کرکٹ بورڈ کے سکریٹری جے شاہ نے اس کی تصدیق کی۔ ہندوستانی ٹیم کو جنوبی افریقہ دورے پر تین ٹیسٹ، تین ایک روزہ اور چار ٹی - 20 مقابلے کھیلنے تھے۔ دورے کی نئی تاریخوں کا اعلان بعد میں کیا جائے گا۔

اتراکھنڈ کانگریس کے صدر گنیش گودیال نے اطلاع دی ہے کہ راہل گاندھی ریاست کا دورہ کرنے جا رہے ہیں۔ انہوں نے بتایا کہ راہل گاندھی 16 دسمبر کو اتراکھنڈ کا دورہ کریں گے اور راجدھانی دہرادون میں جلسہ عام سے خطاب کریں گے۔

تمل ناڈو کے مدورائی میں کلکٹر انیش شیکھر نے ایک حکم جاری کرتے ہوئے کہا ہے کہ عوام ایک ہفتہ کے اندر اندر کورونا ویکسین کی کم از کم ایک خوراک ضرور لگوا لیں بصورت دیگر انہیں عوامی مقامات مثلاً ہوٹل، شاپنگ مالز اور دیگر تجارتی اداروں میں جانے کی اجازت نہیں دی جائے گی۔‘‘