اہم خبریں: روسی یونیورسٹی میں ہوئی فائرنگ میں آٹھ افراد ہلاک

ماسکو: روسی شہر پرم کی ایک یونیورسٹی میں مسلح شخص کی پیر کی صبح فائرنگ میں آٹھ افراد ہلاک ہو گئے۔ تحقیقاتی کمیٹی کی ترجمان سویتلانا پیٹرینکو نے یہ اطلاع دی۔ اس سے قبل بتایا گیا تھا کہ فائرنگ میں پانچ افراد ہلاک اور چھ زخمی ہوئے ہیں۔ پیٹرینکو نے بتایا کہ آٹھ افراد ہلاک اور کئی دیگر زخمی ہوئے ہیں۔

نئی دہلی: دہلی پولس کے اسپیشل سیل نے ممنوعہ جنگجو تنظیم کوکی نیشنل فرنٹ کے ایک جنگجو کو گرفتار کیا ہے۔ اسپیشل سیل کے ایک افسر نے پیر کے روز بتایا کہ کوکی نیشنل فرنٹ کے گرفتار جنگجو کی شناخت منگھولم کیپگن عرف ڈیوڈ کیپگین کے طور پر ہوئی ہے۔ انہوں نے بتایا کہ وہ منی پور کے مختلف تھانہ علاقوں میں پولس سے اسلحہ چھیننا، زر تاوان کی وصولی، فائرنگ، بھتہ خوری، ڈکیتی سمیت مختلف فوجداری مقدمات میں مطلوب تھا۔

بھرت پور: راجستھان میں بھرتپور ضلع کے ندبئی میں پیر کی صبح ریل سے کٹ کر دو اسکولی طالبات کی موت ہوگئی۔ موصولہ اطلاعات کے مطابق ندبئی کے سرکاری گرلز ہاسٹل میں رہنے والی دسویں جماعت کی طالبہ کالبہ جاٹو اور کرشما جاٹو اپنے ہاسٹل سے اسکول کے لئے نکلی تھیں لیکن ہلینا روڈ پر ریلوے لائن عبور کرتے وقت دونوں ٹرین کی زد میں آگئیں جس سے دونوں طالبان کی موقع پر ہی موت ہوگئی۔ پولیس نے دونوں طالبات کی لاشیں قبضے میں لیکر معاملہ کے جانچ شروع کردی ہے۔ اس دردناک حادثے کے بعد قصبے میں غم کا ماحول ہے۔

چرنجیت چنّی نے آج ریاست کے 17 ویں وزیر اعلیٰ کے طور پر حلف لیا۔ حلف برداری کی تقریب آج راج بھون میں صبح 11 بجے تھی، جہاں گورنر بنواری لال پروہت نے چرنجیت چنّی کو اپنے عہدے کا حلف دلایا۔

ماسکو: روس میں ہونے والے عام انتخابات میں ووٹوں کی گنتی میں حکمران ’یونائیٹڈ رشیا پارٹی‘ نے برتری حاصل کر لی ہے۔ روس کے مرکزی الیکشن کمیشن کے اعداد و شمار کے مطابق اب تک 30 فیصد بیلٹ پیپرزکی گنتی کے بعد ’یونائیٹڈ رشیا پارٹی‘ 45.09 فیصد ووٹوں کے ساتھ سب سے آگے ہے۔ ’کمیونسٹ پارٹی آف رشیا فیڈریشن‘ 21.88 فیصد ووٹوں کے ساتھ دوسرے نمبر پر ہے جبکہ ’لبرل ڈیموکریٹک پارٹی آف رشیا‘ نے اب تک 8.37 فیصد ووٹ حاصل کیے ہیں اور وہ تیسرے نمبر پر ہے۔ دوسری طرف ’اے جسٹ روس - فار ٹروتھ سوشل ڈیمو کریٹک پارٹی‘ 7.38 فیصد ووٹوں کے ساتھ چوتھے نمبر پر ہے۔ وہیں نیو پیپلز پارٹی کو ووٹوں کی گنتی میں اب تک 6.35 فیصد ووٹ ملے ہیں۔

کابل: ملک پر کنٹرول حاصل کرنے کے بعد طالبان کے خلاف سب سے زیادہ آواز وہاں کی خواتین اٹھا رہی ہیں۔ افغانستان کے دارالحکومت کابل میں سول سوسائٹی اور خواتین سماجی کارکنان نے مظاہرہ کیا ہے۔ خواتین کا یہ مظاہرہ وزارت خواتین امور کی عمارت کے باہر کیا گیا۔ اس موقع پر احتجاج کر رہی خواتین نے تعلیم اور کام کرنے کا حق دینے کا مطالبہ کیا۔ خیال رہے طالبان نے کابل پر اقتدار حاصل کرنے کے بعد خواتین کے حقوق بتدریج سلب کرنا شروع کر دیئے ہیں۔