جموں و کشمیر: شوپیاں واقع مسجد میں دھماکہ، 2 زخمی

جموں و کشمیر کے شوپیاں ضلع میں ایک مسجد کے اندر پراسرار طریقے سے ایک دھماکہ ہوا جس میں دو لوگ زخمی ہو گئے۔ پولس کا اس واقعہ کے سلسلے میں کہنا ہے کہ چوگام گاوں کی مسجد میں یہ دھماکہ اس وقت ہوا جب اس میں صفائی کا کام چل رہا تھا۔ یہ دھماکہ کس طرح ہوا، اس بات کا اب تک کچھ بھی پتہ نہیں چل سکا ہے۔

پولس کے ایک افسر نے اس واقعہ کی اطلاع دیتے ہوئے میڈیا کو بتایا کہ "دو لوگ زخمی ہوئے ہیں۔ ایسا لگتا ہے کہ پائپ میں کچھ خرابی تھی جس کی وجہ سے اچانک دھماکہ ہو گیا۔" پولس نے زخمیوں کو بغرض علاج اسپتال میں داخل کرا دیا ہے اور پورے معاملے کی جانچ شروع کر دی گئی ہے۔

قابل ذکر ہے کہ شوپیاں ایک ایسا ضلع ہے جہاں اکثر شورش پسندانہ واقعات دیکھنے کو ملتے رہتے ہیں۔ شوپیاں میں ملی ٹنٹوں سے سیکورٹی فورس کے تصادم بھی ہوتے رہتے ہیں۔ شوپیاں میں حال ہی میں کئی تصادم ہوئے ہیں جن میں کئی ملی ٹنٹس بھی مارے جا چکے ہیں۔ ایسے ماحول میں سیکورٹی کے لحاظ سے یہ علاقہ کافی حساس ہے۔ یہی وجہ ہے کہ پولس مسجد میں ہوئے دھماکہ کے تعلق سے باریکی کے ساتھ جانچ کر رہی ہے۔