’قومی آواز‘ کے نوجوان صحافی عمران خان کو صدمہ

قومی آواز کے نوجوان صحافی عمران خان کے والد ڈاکٹر آس محمد کا 22 اکتوبر کی دیر شام انتقال ہو گیا۔ انا للہ وانا الیہ راجعون۔ ڈاکٹر آس محمد گزشتہ سات آٹھ مہینوں سے بیمار چل رہے تھے اور کچھ ہفتہ قبل ہی کینسر کی تشخیص ہوئی تھی۔ اتر پردیش کے مظفر نگر سے تعلق رکھنے والے ڈاکٹر آس محمد کو بہتر علاج کے لیے دہلی اور رشی کیش لے جایا گیا، لیکن ان کی طبیعت میں کوئی بہتری نہیں ہوئی۔

64 سالہ ڈاکٹر آس محمد طب کے شعبہ سے جڑے ہوئے تھے اور وہ آیوروید طریقہ علاج میں ماہر تھے۔ ان کے انتقال کی خبر سے عمران خان اور ان کے اہل خانہ میں غم کا ماحول ہے۔ دوست و احباب ڈاکٹر آس محمد کی مغفرت کے لیے دعاء گو ہیں اور ان کے اہل خانہ کے لیے بھی صبر کی دعاء کر رہے ہیں۔ ان کے پسماندگان میں اہلیہ کے علاوہ دو بیٹے اور دو بیٹیاں ہیں۔ ڈاکٹر آس محمد کی تدفین 23 اکتوبر (ہفتہ) کی صبح 10 بجے مظفر نگر کے میراں پور واقع قبرستان میں ہوگی۔