ہندوستانی طلبا بڑی تعداد میں طبی تعلیم حاصل کرنے یوکرین کیوں جاتے ہیں؟

نئی دہلی: روس-یوکرین جنگ کے درمیان ہندوستان نے وہاں پھنسے ہوئے اپنے 16000 شہریوں کو بحفاظت واپس لانے کی کوششیں شروع کر دی ہیں۔ اس میں تقریباً 14000 ہندوستانی طلبا شامل ہیں، جن میں سے ایک بڑی تعداد طبی تعلیم حاصل کرنے کے لیے ہندوستان سے یوکرین جانے والے طلبا کی ہے۔ اس موقع پر آپ کے دماغ میں یہ سوال گردش کر سکتا ہے کہ آخر اتنے لوگ ڈاکٹر بننے کے لیے انڈیا سے یوکرین کیوں جاتے ہیں؟

دراصل یوکرین میں طبی تعلیم ہندوستان کے مقابلے کافی سستی ہے۔ ہندوستان میں اگر سرکاری کالجوں کو چھوڑ دیا جائے تو ایک طالب علم کو نجی کالج سے ایم بی بی ایس کی ڈگری حاصل کرنے کے لیے تقریباً ایک کروڑ روپے خرچ کرنا پڑتے ہیں۔ جبکہ یوکرین میں 6 سال کی میڈیکل کی تعلیم پر یہ خرچ صرف 22 سے 25 لاکھ روپے ہی آتا ہے۔

یوکرین میں طبی تعلیم سستی ضرور ہے لیکن اس کی قدر کسی طرح سے کم نہیں ہے اور دنیا بھر میں قدر کی جاتی ہے۔ ساتھ ہی یہاں پر تعلیم حاصل کرنے والے طلبا کو بین الاقوامی ماحول میں کام کرنے کا موقع حاصل ہوتا ہے۔ ’اسٹڈی ان یوکرین‘ ویب سائٹ کے مطابق یوکرین کی میڈیکل ڈگریوں کو عالمی ادارہ صحت (ڈبلیو ایچ او)، یورپی کونسل اور دیگر عالمی اداروں نے تسلیم کیا ہے۔

یوکرین کی طبی تعلیم کی مقبولیت کی ایک اور بڑی وجہ ہندوستان میں ایم بی بی ایس کی نشستوں کے لیے سخت مقابلہ ہے۔ ملک میں ایم بی بی ایس کی تقریباً 88000 نشستیں ہیں اور اس میں بھی سرکاری نشستوں کی تعداد تقریباً نصف ہے۔ جبکہ 2021 میں ان سیٹوں پر داخلے کے لیے تقریباً 16 لاکھ طلبا نے نیٹ (این ای ای ٹی) کا امتحان دیا تھا۔ اس کے علاوہ ہر سال ہندوستان سے تقریباً 18000 طالب علم طبی تعلیم حاصل کرنے کے لیے یوکرین جاتے ہیں اور وہاں داخلہ کا عمل بھی بہت آسان ہے۔

یوکرین سے حاصل کی گئی میڈیکل ڈگریوں کو نیشنل میڈیکل کمیشن تسلیم کرتا ہے۔ ایسے میں متوسط ​​طبقے سے تعلق رکھنے والے طلبا یوکرین سے سستی میڈیکل ڈگری حاصل کرنے کے بعد ہندوستان لوٹتے ہیں۔ یہاں آنے کے بعد وہ کچھ کاغذات دے کر میڈیکل انٹرن شپ اور پریکٹس کا لائسنس حاصل کرتے ہیں۔ اس کے علاوہ غیر ملکی ڈگری ہونے کے سبب ملازمت کے بہتر مواقع حاصل ہوتے ہیں۔

یوکرین سے طبی تعلیم حاصل کرنے کے بعد طلبا کو یورپ میں ہی کام کرنے کا بھی موقع حاصل ہوتا ہے۔ یہی نہیں ملازمت کے ساتھ ساتھ انہیں یورپ میں مستقل سکونت اختیار کرنے کا بھی موقع حاصل ہوتا ہے۔