بی جے پی کی ہے سرکار تو مجرموں کو ڈر کاہے کا؟ پرینکا گاندھی کا طنز

بی جے پی حکومت کے دوران کئی ارکان اسمبلی پر عصمت دری اور فساد بھڑکانے جیسے الزامات عائد ہونے اور ان کے نام مقدمہ سے نکالے جانے کے حوالہ سے کانگریس کی جنرل سکریٹری پرینکا گاندھی نے طنز کرتے ہوئے کہا کہ بی جے پی کی حکومت کے دوران مجرم بے خوف ہیں کیوںکہ بی جے پی حکومت کی طرف سے ان کی پشت پناہی کی جا رہی ہے۔

بی جے پی پر طنز کرتے ہوئے کانگریس کی جنرل سکریٹری پرینکا گاندھی نے ٹوئٹر پر لکھا، ’’کورٹ کچہری اب کچھ نہیں۔ بی جے پی کی ہے سرکار، تو مجرموں کو ڈر کاہے کا؟ کلدیپ سنگھ کو تحفظ دیا جائے گا۔ سنگیت سوم سے مقدمے ہٹا دیئے جائیں گے۔ تو مجرم ڈریں گے کیسے؟‘‘

حال ہی میں یہ خبر منظر عام پر آئی ہے کہ بی جے پی کے رکن اسمبلی سنگیت سوم پر 2013 میں ہوئے مظفرنگر فساد کے بعد فساد بھڑکانے کے جو مقدمات درج کیے گئے تھے انہیں یوگی آدتیہ ناتھ کی قیادت والی بی جے پی حکومت نے واپس لینے کا عمل شروع کر دیا ہے۔

ادھر، اناؤ عصمت دری کا معاملہ بھی لگاتار شہ سرخیوں میں بنا ہوا ہے۔ اس معاملہ میں بی جے پی کے رکن اسمبلی کلدیپ سینگر ملزم ہیں اور بی جے پی کا کہنا ہے کہ اسے پارٹی سے معطل کر دیا گیا ہے۔ لیکن اب یوم آزادی کی مبارکباد کا ایسا اشتہار منظر عام پر آیا ہے جس میں کلدیپ سینگر کی تصویر وزیر اعظم مودی کی تصویر کے ساتھ موجود ہے۔

پرینکا گاندھی نے ٹوئٹ کے ساتھ ایک رپورٹ بھی شیئر کی ہے، جس میں سنگیت سوم کے خلاف چل رہے مقدموں کی واپسی کے حوالہ سے خبر شائع کی گئی ہے۔ جن ستہ میں شائع رپورٹ کے مطابق سال 2003 سے 2017 کے دران سنگیت سوم پر جو بھی مقدمہ درج کیے گئے تھے انہیں واپس لیا جائے گا۔ سنگیت سوم پر مظفر نگر میں ہوئے فساد کے دوران سہارنپور اور نوئیڈا میں پنچایت کرنے اور دفعہ 144 کی خلاف ورزی کرنے کا معاملہ شامل ہے۔

اس کے علاوہ سرکاری کاموں میں رخنہ ڈالنا، ہنگامہ کرنا، شہر میں دہشت پھیلانا، جام لگانا، آئی ٹی ایکٹ سمیت کئی دیگر معاملہ درج ہیں۔ سنگیت سوم کے خلاف سہارنپور کے دیوبند، مظفرنگر کے کھتولی، کوتوالی، سکھیڑا، میرٹھ اور گوتم بدھ نگر میں معاملے درج ہیں۔ ان معاملات کے حوالہ سے اتر پردیش حکومت کے خصوصی سکریٹری رام بلاس سنگھ نے چاروں اضلاع سے رپورٹ طلب کی ہے۔