کورونا سے خوفزدہ وی ایچ پی نے عقیدتمندوں سے کی ایودھیا دورہ ملتوی کرنے کی اپیل

ایودھیا: ملک میں کورونا وائرس کے بڑھتے انفیکشن سے فکرمند وشو ہندو پریشد(وی ایچ پی)نے عقیدت مندوں خصوصاً جنوبی ہندوستانیوں سے کچھ دنوں کےلئے ایودھیا کا مجوزہ دورہ ملتوی کرنے کی اپیل کی ہے۔ وی ایچ پی کے ترجمان شرد شرما نے ہفتہ کے روز حکومت سے اس سلسلے میں ایک خاصہ مطالبہ بھی کیا۔ انھوں نے حکومت سے کہا ہے کہ وہ جنوبی ہندوستان سے ایودھیا آنے والے عقیدت مندوں پر پابندی لگائے اور لوگوں سے اپیل کرے کہ وہ ایودھیا کا دورہ کرنےسے بچیں۔

وی ایچ پی ترجمان نے وی ایچ پی ہیڈکوارٹر کارسیوک پورم میں یواین آئی سے بات چیت کرتے ہوئے کہا کہ ملک میں کورونا وائرس کے خطرے کے پیش نظر ایودھیا میں جنوبی ہندوستان سے آنےو الے عقیدت مندوں پر پابندی لگائے جانےکی اس وقت اشد ضرورت ہے۔ انہوں نے مزید کہا کہ ایودھیا کے سنت دھرماچاریہ اور ملک کے وزیراعظم،وزیراعلی نے بھی بھیڑ بھاڑ والے علاقوں میں نہ جانے اور کورونا وائرس سےبچنے کی واضح طورپر ہدایت دی ہے۔جنوبی ہندوستان سے مسلسل آنے والے عقیدت مندوں کی بھیڑ سے مکمل ایودھیا شہر فکرمند اور خوف زدہ ہے۔ اس لیے ضروری ہے کہ انھیں ایودھیا دورہ سے روکا جائے۔