اتر پردیش: انتخابی منشور تیار کرنے کے لیے ‘عوامی مہم’ چلائے گی کانگریس

کانگریس نے اتر پردیش میں عوامی مہم چلا کر اپنا انتخابی منشور تیار کرنے کا فیصلہ کیا ہے۔ اس مہم میں اسمبلی سطح کی میٹنگیں کی جائیں گی تاکہ عوام سے جڑے اہم ایشوز کو انتخابی منشور میں شامل کیا جا سکے۔

پرینکا گاندھی
پرینکا گاندھی
user

وشو دیپک

ایک طرف جہاں اتر پردیش کی یوگی حکومت عوامی مسائل سے آنکھیں پھیرتی ہوئی نظر آ رہی ہے اور خصوصی طور پر کورونا بحران میں بڑھ رہی بے روزگاری کو لے کر کوئی ٹھوس قدم نہیں اٹھا رہی ہے، وہیں دوسری طرف کانگریس لگاتار عوام کے درمیان جا کر ان کی مصیبتوں و مسائل کا پتہ کر رہی ہے اور ان کے ایشوز کو حکومت کے سامنے رکھ بھی رہی ہے۔ اس درمیان یو پی اسمبلی انتخاب کو لے کر کانگریس نے انتخابی منشور تیار کرنے کا عمل شروع کرنے کا فیصلہ کیا ہے اور خاص بات یہ ہے کہ پارٹی نے اس میں عوام کی شراکت داری یقینی بنانے پر زور دیا ہے۔

اس تعلق سے یو پی کانگریس کی انچارج قومی جنرل سکریٹری پرینکا گاندھی نے مینی فیسٹو کمیٹی (انتخابی منشور کمیٹی) کے اراکین کے ساتھ ویڈیو کانفرنسنگ کے ذریعہ میٹنگ کی۔ میٹنگ میں انتخابی منشور بنانے کو لے کر ایک مضبوط پالیسی تیار کی گئی تاکہ عوام کے مسائل اور ان کی ضرورتوں کا خاص خیال رکھتے ہوئے انتخابی میدان میں اترا جائے۔ میٹنگ میں اتر پردیش کے نظامِ قانون، کسانوں کے ایشوز، بدعنوانی، بے روزگاری اور بگڑتے معاشی حالات پر سنجیدگی کے ساتھ غور و فکر ہوا۔

میٹنگ میں یہ طے کیا گیا کہ پوری ریاست میں عوامی مہم چلا کر کانگریس پارٹی اپنا انتخابی منشور تیار کرے گی اور اس مہم میں اسمبلی سطح کی میٹنگیں کی جائیں گی تاکہ عوام سے جڑے ایشوز کو منشور میں شامل کیا جا سکے۔ ساتھ ہی میٹنگ میں یہ بھی طے پایا کہ سوشل میڈیا و دیگر ڈیجیٹل ذریعہ سے بھی عوام کے مشورے طلب کیے جائیں گے تاکہ کوئی بھی اہم ایشو انتخابی منشور میں شامل ہونے سے نہ رہ جائے۔ علاوہ ازیں ریاست کے دانشور طبقہ اور عوامی تنظیموں سے بھی تحریری طور پر مشورے طلب کیے جائیں گے۔ انتخابی منشور کے لیے اسمبلی سطح پر عام لوگوں سے بھی اس طرح کے مشورے لیے جائیں گے اور ایشوز کے بارے میں پوچھا جائے گا۔

بتایا جاتا ہے کہ کانگریس نے انتخابی منشور تیار کرنے میں پارٹی کے ہر رکن کی ذمہ داری طے کرنے کا فیصلہ کیا ہے اور اس سے عوام کی رائے پر مبنی انتخابی منشور تیار کرنے میں کافی مدد ملے گی۔ مینی فیسٹو کمیٹی کی اس میٹنگ میں کمیٹی کے رکن سلمان خورشید، راجیہ سبھا رکن پارلیمنٹ پی ایل پونیا، سپریا سری نیتر، وویک بنسل، امیتابھ دوبے کے علاوہ یو پی کانگریس کمیٹی کے صدر اجے کمار للو اور قانون ساز پارٹی لیڈر آرادھنا مشرا مونا بھی موجود تھیں۔

next