اتر پردیش: شاہجہانپور میں ہولناک سڑک حادثہ، 17 افراد ہلاک

شاہجہانپور: اتر پردیش کے شاہجہانپور میں لکھنؤ -دہلی قومی شاہراہ پر ہونے والے ایک ہولناک سڑک حادثہ میں 17 افراد کی موت ہو گئی ہے جبکہ 4 دیگر لوگ زخمی ہو گئے۔ اطلاعات کے مطابق بے قابو ٹرک نے ٹیمپو کو پیچھے سے ٹکر مار دی۔ اسی وقت قریب سے گزر رہی پک اپ وین بھی حادثہ کی زد میں آ گئی۔ اس حادثہ میں تینوں گاڑیوں کو نقصان پہنچا ہے۔

ٹیمپو اور میجک پر سوار 10 افراد کی موقع پر ہی مو ت ہوگئی جبکہ دیگر سات نے علاج کے دوران اسپتال میں دم توڑ دیا، زخمیوں میں چار کی حالت نازک ہے۔ ٹرک ڈرائیور کو گرفتار کرلیا گیا ہے۔

شاہجہانپور کے ایڈیشنل پولس سپرنٹنڈنٹ دنیش ترپاٹھی نے بتایا کہ سیتاپور کی جانب سے پان مصالحہ لے کر آ رہا ٹرک روضہ علاقہ میں جموکا تراہے کے نزدیک بے قابو ہو گیا۔

انہوں نے کہا، ’’ٹرک نے آگے چل رہے ٹیمپو کو پیچھے سے ٹکر مار دی۔ اسی وقت وہاں سے گزر رہی پک اپ وین بھی حادثہ کا شکار ہو گئی۔ ‘‘ ترپاٹھی نے کہا ، ’’حادثہ میں 17 افراد کی موت ہوئی ہے اور 4 دیگر زخمی ہوئے ہیں۔‘‘

حادثہ کے بعد شاہراہ پر لوگوں نے جام لگانے کی کوشش کی لیکن ضلع مجسٹریٹ اندر وکرم سنگھ اور پولس سپرنٹنڈنٹ ڈاکٹر ایس چنپا نے پہنچ کر حالات کو سنبھالا۔

دونوں افسران ضلع اسپتال پہنچے اور حادثہ میں زخمی ہوئے ٹیمپو ڈرائیور انیس سے پوچھ گچھ کی۔ ضلع مجسٹریٹ اندر وکرم سنگھ نے کہا ، ’’ٹیمپو ڈرائیور سے پوچھ گچھ کی گئی ہے۔ اس کی باتوں سے لگ رہا ہے کہ ٹرک کا اسٹیرنگ فیل ہوگیا تھا، جس سے وہ بے قابو ہو گیا اور ٹیمپو میں ٹکر مارنے کے بعد پک اپ وین پر پلٹ گیا۔ ہلاک شدگان کی شناخت کی کوشش کی جا رہی ہے جبکہ زخمیوں کا بہتر علاج معالجہ کے لئے ہر ممکن مدد کی جائے گی۔ ‘‘

اتر پردش کے وزیر اعلیٰ یوگی آدتیہ ناتھ نے شاہجہانپور میں ہوئے سڑک حادثہ میں 17 لوگوں کی موت پر گہرے افسوس کا اظہار کیا ہے۔ وزیر اعلیٰ نے ڈی ایم اندر وکرم کو ہلاک شدگان کے اہل خانہ کو فوری راحتی رقم دستیاب کرانے کی ہدایت کی ہے۔ علاوہ ازیں حادثہ میں زخمی لوگوں کا علاج کرانے کی ہدایت دی ہے۔