پی ایم مودی کے حلقہ میں ایم ایل سی کی دونوں سیٹوں پر سماجوادی پارٹی کا قبضہ، بی جے پی کو جھٹکا

لکھنؤ: اتر پردیش قانون ساز کونسل کے وارانسی حلقہ انتخابات میں سماج وادی پارٹی (ایس پی) نے حکمراں جماعت بھارتیہ جنتا پارٹی (بی جے پی) کو کراری شکست دی ہے۔ ایس پی نے دونوں سیٹوں پر قبضہ کر لیا ہے۔ ان میں سے ایک پر بی جے پی اور دوسری پر اس کے حمایتی امیدوار گزشتہ دو بارسے کامیابی حاصل کرتے رہے ہیں۔

گریجوایت زمرے کے ایم ایل سی انتخابات میں ایس پی امیدوار آشوتوش سنہا نے اپنے قریبی حریف بی جے پی امیدوار کیدار ناتھ سنگھ کو شکست دی ہے۔ کیدار ناتھ سنگھ اس سیٹ پر دو مرتبہ فتحیاب رہے تھے اور آشوتوش سنہا نے ایک سخت مقابلے میں انہیں شکست دی۔ وارانسی کے سدھاگری باغ کے رہائشی آشوتوش سنہا نے گنتی کے آخری مرحلے میں 26535 ووٹ حاصل کیے جبکہ ضلع کے ساکیت نگر کالونی کے رہنے والے کیدار ناتھ سنگھ نے 22685 ووٹ حاصل کیے۔

اس سے قبل جمعہ کے روز ٹیچر زمرے کی سیٹ پر لال بہار یادو نے آزاد امیدوار پرمود مشرا کو 936 ووٹوں سے ہرایا تھا۔ بی جے پی کی حمایت یافہ امیدوار رخصت پزیر ایم ایل سی چیت نارائن سنگھ تیسرے مقام پر رہے۔ خیال رہے کہ یہ انتخابات بی جے پی کے لئے کافی اہم ہیں کیونکہ 100 ارکان پر مشتمل یوپی قانون ساز کونسل میں فی الحال بی جے پی کے محض 19 ارکان ہیں جبکہ سماجوادی پارٹی کے 52 ارکان ہیں۔

سہارن-پور میرٹھ ڈویزن میں بی جے پی کامیاب

بی جے پی نے مغربی اتر پردیش اور میرٹھ ڈویژن کی قانون ساز کونسل کی اساتذہ اور گریجویٹ کی نشستوں پر پہلی بار کامیابی حاصل کرکے تاریخ رقم کی۔ ہفتے کے روز اعلان کردہ انتخابی نتائج میں گریجویشن سیٹ کے بی جے پی امیدوار دنیش کمار گوئل نے سہارن پور کے رہائشی ہیم سنگھ پنڈیر ، سیکنڈری اساتذہ ایسوسی ایشن کے امیدوار اور موجودہ قانون ساز کونسل کے ممبر کو 27080 ووٹوں کے فرق سے شکست دی۔

اس کے ساتھ ہی، سیکنڈری اساتذہ ایسوسی ایشن کے صدر اوم پرکاش شرما ، جو اساتذہ کی نشست پر 48 سال سے قانون ساز کونسل کے ممبر رہے، کو بھی شکست کا سامنا کرنا پڑا۔ انہیں بی جے پی کے امیدوار سری چند شرما نے 4540 ووٹوں کے فرق سے شکست دی۔ بی جے پی قیادت کی حوصلہ بڑھانے والی فتح گریجویشن سیٹ پر بھی ہوئی جس میں تعلیمی اداروں کے ڈائریکٹر اور وشو ہندو پریشد کے رہنما دنیش کمار گوئل نے جی حاصل کی۔