یوکرین بحران: سلامتی کونسل میں قرارداد پر ہندوستان کے رخ کی روس نے کی تعریف

روس نے اقوام متحدہ کی سلامتی کونسل (یو این ایس سی) کی قرارداد پر ووٹنگ کے دوران ہندوستان کی آزاد حیثیت کی تعریف کرتے ہوئے کہا کہ وہ اس بحران پر دہلی کے ساتھ بات چیت کے لیے پرعزم ہے

تصویر سوشل میڈیا
تصویر سوشل میڈیا
user

قومی آوازبیورو

نئی دہلی: روس نے اقوام متحدہ کی سلامتی کونسل (یو این ایس سی) کی قرارداد پر ووٹنگ کے دوران ہندوستان کی آزاد حیثیت کی تعریف کرتے ہوئے کہا کہ وہ اس بحران پر دہلی کے ساتھ بات چیت کے لیے پرعزم ہے۔ خیال رہے کہ ہندوستان نے اقوام متحدہ کی سلامتی کونسل کی اس قرارداد پر ووٹنگ سے گریز کیا تھا، جس میں یوکرین کے خلاف روس کے حملے کی شدید مذمت کی گئی تھی۔ ہندوستان کا کہنا تھا کہ اختلافات اور تنازعات کو صرف اور صرف مذاکرات کے ذریعے ہی حل کیا جا سکتا ہے۔

ہندوستان میں روسی سفارت خانہ نے ٹوئٹ کیا، ’’اقوام متحدہ کی سلامتی کونسل میں 25 فروری 2022 کو ووٹنگ کے دوران ہندوستان کی آزاد اور متوازن پوزیشن کی تعریف کرتے ہیں۔ خصوصی اور مراعات یافتہ سفارتی شراکت داری کی روح کی بنیاد پر روس یوکرین کے ارد گرد کی صورتحال پر ہندوستان کے ساتھ قریبی بات چیت کو برقرار رکھنے کے لیے پرعزم ہے۔‘‘


اقوام متحدہ کی سلامتی کونسل نے امریکہ اور البانیہ کی طرف سے پیش کردہ قرارداد کے مسودے پر ووٹنگ کی تھی، جس کی آسٹریلیا، ایسٹونیا، فن لینڈ، جارجیا، جرمنی، اٹلی، لیختنسٹائن، لتھوانیا، لکسمبرگ، نیوزی لینڈ، ناروے، پولینڈ، رومانیہ اور برطانیہ کی جانب سے حمایت کی گئی تھی۔

روس نے یو این ایس سی کے اجلاس کی صدارت کی اور قرارداد کو ویٹو کر دیا۔ میٹنگ میں ہندوستان کے ساتھ چین اور یو اے ای نے بھی شرکت کی مگر خود کو روس کے خلاف پیش کی گئی قرارداد پر ووٹنگ سے علیحدہ رکھا۔

ایک بیان میں اقوام متحدہ میں ہندوستان کے مستقل نمائندے ٹی ایس ترومورتی نے کہا اختلافات اور تنازعات کو حل کرنے کا واحد جواب بات چیت ہے، چاہے اس وقت یہ کتنا ہی مشکل کیوں نہ ہو۔ ان کا مزید کہنا تھا کہ افسوس کی بات ہے کہ سفارت کاری کا راستہ چھوڑ دیا گیا۔ ہمیں اس طرف لوٹنا ہے۔ ان تمام وجوہات کی بنا پر، بھارت نے اس پیشکش سے باز رہنے کا انتخاب کیا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔