اگنی پتھ: بہار میں 3 دنوں تک صبح 4 بجے سے رات 8 بجے تک ٹرین آمد و رفت پر پابندی

بہار میں فوج بھرتی کی نئی اسکیم اگنی پتھ کو لے کر ہو رہے احتجاجی مظاہروں کو دیکھتے ہوئے ریلوے نے اعلان کیا ہے کہ ایسٹ سنٹرل ریلوے زون میں صبح چار بجے سے رات آٹھ بجے تک ٹرینوں کی آمد و رفت بند رہے گی۔ یعنی اس زون میں سبھی ٹرینیں رات آٹھ بجے سے صبح چار بجے تک ہی چل پائیں گی۔ ایسٹ سنٹرل ریلوے کے چیف پبلک رلیشن افسر ویریندر کمار نے ہفتہ کے روز اس سلسلے میں ایک بیان جاری کیا جس میں کہا کہ بہار میں چل رہے دھرنا و مظاہرہ کے سبب مسافروں کی سیکورٹی کو پیش نظر رکھتے ہوئے دوسرے زون کی ریلوں سے کھل کر ایسٹ سنٹرل ریل زون سے گزرنے یا پہنچنے والی ٹرینوں کی آمد و رفت میں عارضی طور پر تبدیلی کی گئی ہے۔

ویریندر کمار کا کہنا ہے کہ مسافروں اور ریلوے کی ملکیت کی حفاظت کو دیکھتے ہوئے یہ فیصلہ لیا گیا ہے کہ 18 جون سے 20 جون تک ایسٹ سنٹرل ریل زون سے گزرنے اور پہنچنے والی ٹرینوں کی آمد و رفت رات آٹھ بجے کے بعد سے صبح چار بجے تک کیا جائے گا۔

قابل ذکر ہے کہ اگنی پتھ منصوبہ کی مخالفت میں بہار میں سب سے زیادہ تشدد ہوا ہے۔ یہاں ناراض بھیڑ نے درجنوں ٹرینوں کو نذرِ آتش کر دیا ہے اور کئی شہروں و قصبوں میں عوامی ملکیتوں کو نقصان پہنچایا ہے۔ جمعہ کو صبح پانچ بجے سے شام پانچ بجے تک بڑی تعداد میں مظاہرین نے 60 سے زیادہ کوچوں اور 10 سے زیادہ انجنوں میں آگ لگائی تھی۔ اس کے علاوہ کئی ریلوے اسٹیشنوں میں بھی توڑ پھوڑ کی گئی۔