کورونا دور میں ڈاکٹروں کی خدمات قابل تحسین: مودی

نئی دہلی: وزیراعظم نریندر مودی نے کورونا کے دور میں ڈاکٹروں کی خدمات کی تعریف کرتے ہوئے ڈاکٹروں کو یکم جولائی کو منعقد ہونے والے ’ڈاکٹرس ڈے‘ کی پیشگی نیک خواہشات دیں اور کہا کہ ان کی خودسپردگی کی وجہ سے وبا سے لاتعداد لوگوں کی جان بچائی جاسکی ہے۔ مودی نے اتوار کو ریڈیو پر نشر ہوئے اپنے ماہانہ پروگرام ’من کی بات‘ میں کہا کہ یکم جولائی کو ہم نیشنل ڈاکٹرس ڈے منائیں گے۔ یہ دن ملک کے عظیم ڈاکٹر اور اسٹیٹس مین ڈاکٹر بی سی رائے کے یوم پیدائش کو وقف ہے۔ کورونا کے دور میں ڈاکٹروں کی خدمات کے ہم سب شکرگزار ہیں۔ ہمارے ڈاکٹروں نے اپنی جان کی پرواہ نہ کرتے ہوئے ہماری خدمت کی اس لئے اس بار نیشنل ڈاکٹرس ڈے مزید خاص ہوجاتا ہے۔

پی ایم مودی نے طبی دنیا کے سب سے معزز ہیپوکریٹس کی مثال دیتے ہوئے کہا کہ جہاں آرٹ آف میڈیسن کے لئے محبت ہوتی ہے وہاں انسانیت کے لئے بھی محبت ہوتی ہے۔ ڈاکٹراسی محبت کی طاقت سے ہماری خدمت کرپاتے ہیں اس لئے ہماری یہ ذمہ داری ہے کہ ہم اتنی ہی محبت سے ان کا شکریہ ادا کریں اور ان کی حوصلہ افزائی کریں۔ انہوں نے ڈاکٹروں کی مدد کے لئے آگے آنے والے لوگوں کا ذکر کرتے ہوئے کہا کہ سری نگر سے ایک ایسی ہی کوشش کے بارے میں مجھے پتہ چلا ہے۔ یہاں ڈل جھیل میں ایک بوٹ ایمبولنس سروس کی شروعات کی گئی۔ اس سروس کو سری نگر میں ایک ہاؤس بوٹ کے مالک طارق احمد پتلو جی نے شرو ع کیا ہے۔ انہوں نے خود بھی کووڈ۔19 سے جنگ لڑی ہے اور اسی نے انہیں ایمبولنس سروس شرو ع کرنے کی ترغیب دی۔ ان کی اس ایمبولنس سروس سے لوگوں کو بیدار کرنے کی مہم چل رہی ہے وہ مسلسل ایمبولنس سے اعلانات بھی کر رہے ہیں۔ کوشش یہی ہے کہ لوگ ماسک پہننے سے لیکر دوسری ہر ضروری احتیاط برتیں۔

وزیراعظم نے کہا کہ کورونا کے خلاف ہندوستان کی لڑائی کی ایک بڑی خاصیت یہ ہے کہ اس لڑائی میں ہر شخص نے اپنا کردار ادا کیا ہے۔ میں نے ’من کی بات‘ میں اکثر اس کا ذکر کیا ہے لیکن کچھ لوگوں کو شکایت بھی رہتی ہے کہ ان کے بارے میں اتنی بات نہیں ہوپاتی ہے۔ متعدد لوگ خواہ وہ بینک اسٹاف ہو، ٹیچرس ہو، چھوٹے کاروباری یا دکاندار ہوں، دکانوں میں کام کرنے والے لوگ ہوں، ریہٹری پٹری والے بھائی بہن ہوں، واچ میچ یا پھر پوسٹ مین اور پوسٹ آفس کے ملازم، دراصل یہ فہرست بہت طویل ہے اور ہر کسی نے اپنا کردار ادا کیا ہے۔ سرکاری انتظامیہ میں بھی متعدد لوگ الگ الگ سطح پر مصروف عمل رہے ہیں۔