مرکز کا عدالت عظمیٰ میں حلف نامہ، این ای ای ٹی ایس ایس 2021 میں نصاب نہیں بدلے گا

نئی دہلی: مرکزی حکومت نے بدھ کے روز سپریم کورٹ کو بتایا کہ میڈیکل سپر اسپیشلیٹیز میں داخلے کے لیے قومی اہلیتی کم داخلہ ٹسٹ ( ای ای ای ٹی ایس ایس 2021) تبدیل شدہ نصاب کے مطابق نہیں ہوگا۔ جسٹس ڈی وائی چندرچوڑ کی سربراہی میں بنچ کے سامنے حکومت نے کہا کہ ای ای ای ٹی ایس ایس 2022 کا امتحان تبدیل شدہ نصاب کے مطابق لیا جائے گا۔

خیال رہے میڈیکل پوسٹ گریجویٹ کے 40 ڈاکٹر طلباء نے حکومت کی طرف سے نصاب میں اچانک تبدیلی کو چیلنج کرنے کی درخواست دائر کی تھی۔ مرکزی حکومت نے منگل کو ایک حلف نامہ داخل کرتے ہوئے کہا تھا کہ نومبر میں منعقد ہونے والا این ای ای ٹی ایس ایس -2021 کا امتحان 10-11 جنوری 2022 کو لیا جائے گا۔

درخواست گزاروں نے کہا کہ امتحان سے عین قبل نصاب میں تبدیلی کی وجہ سے انہیں تیاری کے لیے بہت کم وقت ملے گا۔ سماعت کے دوران حکومت نے عدالت کو امتحان کی تاریخ میں تقریباً دو ماہ کی توسیع کے فیصلے سے آگاہ کیا تھا۔ لیکن درخواست گزار اس سے متفق نہیں تھے۔ اب حکومت نے پرانے نصاب کے مطابق امتحان لینے کا فیصلہ لیا ہے اور عدالت کو آج اس سے آگاہ کیا۔