پولیس، سی بی آئی، ای ڈی کی چارج شیٹ برسرعام کرنے کے مطالبہ والی عرضی پر سپریم کورٹ نے فیصلہ رکھا محفوظ

سپریم کورٹ نے پیر کے روز اس عرضی پر اپنا فیصلہ محفوظ رکھ لیا جس میں پولیس، سی بی آئی اور ای ڈی جیسی جانچ ایجنسیوں کے ذریعہ معاملوں میں داخل چارج شیٹ تک لوگوں کی مفت رسائی کا مطالبہ کیا گیا تھا۔ جسٹس ایم آر شاہ اور جسٹس سی ٹی روی کمار نے زبانی طور سے کہا کہ اگر چارج شیٹ ان لوگوں کو دی جاتی ہے جو معاملے سے تعلق نہیں رکھتے ہیں، غیر سرکاری تنظیمیں ہیں تو ان کا غلط استعمال ہو سکتا ہے۔ عدالت نے کہا کہ ’’چارج شیٹ ہر کسی کو نہیں دی جا سکتی۔‘‘

عدالت عظمیٰ وکیل پرشانت بھوشن کے ذریعہ سے داخل صحافی اور شفافیت کارکن سورو داس کی عرضی پر سماعت کر رہی تھی۔ سماعت کے دوران بنچ نے اشارہ دیا کہ ای ڈی کی چارج شیٹ کو برسرعام کیے جانے کے ایشو کا تذکرہ گزشتہ سال کے پی ایم ایل اے فیصلے میں کیا گیا ہے، جسے عدالت عظمیٰ کی تین ججوں کی بنچ نے پاس کیا تھا۔

پرشانت بھوشن نے ہندوستانی ثبوت ایکٹ کی دفعہ 74 کا حوالہ دیتے ہوئے دلیل پیش کی کہ فرد جرم ’عوامی دستاویز‘ ہیں، جن تک رسائی دی جا سکتی ہے۔ انھوں نے دلیل دی کہ عدالت اسی طرح کی ہدایت یوتھ بار ایسو سی ایشن کے معاملے میں پاس کر سکتی ہے، جس میں ایف آئی آر کو 24 گھنٹے کے اندر آن لائن اَپلوڈ کرنے کی ہدایت دی گئی تھی۔

بھوشن نے یہ بھی کہا کہ عوامی اتھارٹی مناسب جانچ کے بعد چارج شیٹ تیار کرتے ہیں اور ایسی کوئی وجہ نہیں ہے کہ لوگ اسے ایکسس کرنے میں اہل کیوں نہ ہوں۔ دلیلیں سننے کے بعد بنچ نے کہا کہ وہ عرضی پر غور کرے گی اور اس پر تفصیلی حکم پاس کرے گی۔

عرضی میں کہا گیا ہے کہ ’’سپریم کورٹ کے ذریعہ پولیس کو اپنی ویب سائٹس پر ایف آئی آر کی کاپیاں شائع کرنے کی ہدایت نے واقعی میں مجرمانہ نظام انصاف کے کام میں شفافیت کے لیے ترغیب دی ہے، اس لیے اگر بے بنیاد الزامات پر چارج شیٹ داخل کی جاتی ہے تو اس کی جانچ کی جانی چاہیے۔‘‘

عرضی میں کہا گیا ہے کہ شہریوں کو چارج شیٹ تک رسائی کا قانونی اور آئینی حق ہے، کیونکہ جاننے کا حق دفعہ 19(1)(A) کے تحت تقریر اور اظہار رائے کی آزادی سے حق سے پیدا ایک بنیادی حق ہے اور اسے بھی سپریم کورٹ کے ذریعہ قانون کی شکل میں طے کیا گیا ہے۔ شفافیت کے لیے ویب سائٹس پر چارج شیٹ دستیاب کرانا اور چارج شیٹ تک بہ آسانی رسائی کو کامیاب بنانا ضروری ہے، تاکہ شہری جانکاری حاصل کر سکیں اور پریس مجرمانہ مقدمات پر اعتماد کے ساتھ اور بہتر طریقے سے رپورٹ کر سکیں۔