راجیو چوک میٹرو اسٹیشن پر ’گولی مارو...‘ کے نعرے، سی اے اے کے 6 حامی حراست میں

نئی دہلی: دہلی میٹرو کے مشہور اسٹیشن راجیو چوک کے اندر اس وقت افرا تفری کا ماحول پیدا ہو گیا جب اچانک کچھ بھگوا کپڑے پہنے ہوئے لوگ نعرے بازی کرنے لگے۔ یہ سب دیش کے غداروں کو، گولی مارو ... کو‘ کے نعرے لگا رہے تھے۔ نعرے لگانے والے لوگوں کا کہنا تھا کہ وہ سی اے اے کے حق میں آواز اٹھا رہے ہیں۔

میٹرو اسٹیشن پر اس طرح نعرے لگانے کے بعد، دہلی میٹرو ریل کارپوریشن (ڈی ایم آر سی) اور سنٹرل انڈسٹریل سیکورٹی فورس (سی آئی ایس ایف) نے فوری کارروائی کی اور ان لوگوں کو دہلی میٹرو ریل پولیس کے حوالے کر دیا گیا۔ پولیس نے ان چھ افراد کو حراست میں لیا ہے۔

دہلی میٹرو کے ایگزیکٹو ڈائریکٹر (کارپوریٹ مواصلات) انوج دیال نے یہاں جاری ایک بیان میں کہا ہے کہ یہ واقعہ صبح 10.52 کے قریب ہوا اور کچھ لوگوں نے اچانک وہاں نعرے بازی شروع کر دی۔ دلچسپ بات یہ ہے کہ ڈی ایم آر سی نے نعرے بازی کرنے والے لوگوں کو مسافر قرار دیا ہے۔

ڈی ایم آر سی کا کہنا ہے کہ اسٹیشن پر موجود میٹرو اسٹاف اور حفاظتی اہلکار نے نعرے لگانے والوں کو مزید کارروائی کے لئے فوری ڈی ایم آر سی پولیس کے حوالہ کر دیا۔ دہلی میٹرو کے آپریشن اور بحالی ایکٹ 2002 کے تحت میٹرو احاطے کے اندر کسی بھی طرح کا مظاہرہ ممنوع ہے اور ایسی سرگرمیوں میں ملوث افراد کو میٹرو کمپلکس سے ہٹایا جا سکتا ہے۔