’کھیل اب شروع ہوا ہے‘، انفورسمنٹ ڈائریکٹوریٹ کی کارروائی پر سنجے راؤت کا بیان

شیوسینا رکن پارلیمنٹ سنجے راؤت نے انفورسمنٹ ڈائریکٹوریٹ (ای ڈی) کی کارروائی کو پر مرکز کی مودی حکومت کو تنقید کا نشانہ بناتے ہوئے کہا کہ کھیل اب شروع ہوا ہے۔ راجیہ سبھا رکن پارلیمنٹ سنجے راؤت لگاتار مرکزی حکومت پر حملہ آور ہیں۔ سنجے راؤت نے پیر کے روز ٹوئٹ کر کے کہا کہ کھیل اب شروع ہوا ہے۔ آج وزیر اعظم دفتر کے سامنے ثبوت پیش کیے ہیں۔ کیسے مرکزی ایجنسیاں کچھ لوگوں کے خلاف طاقت کا غلط استعمال کر رہی ہیں۔ کچھ افسر جبراً وصولی اور بلیک میلنگ میں وصولی ایجنٹوں کے ذریعہ سے شامل ہونے پر ثبوت جمع کیے ہیں۔ راؤت نے کہا کہ زیادہ جانکاری شیئر کرنے کے لیے جلد ہی ایک پریس کانفرنس کی جائے گی۔

دراصل مہاراشٹر میں ای ڈی اور انکم ٹیکس محکمہ کی چھاپہ ماری کے بعد سیاسی ہلچل مچی ہوئی ہے۔ ریاستی وزیر نواب ملک کی گرفتاری کے بعد شیوسینا کارپوریٹر و برہنممبئی نگر نگم (بی ایم سی) کی اسٹینڈنگ کمیٹی کے سربراہ شونت جادھو کے گھر اور ٹھکانے پر انکم ٹیکس چھاپہ کو لے کر شیوسینا حملہ آور ہے۔

اس سے قبل شیوسینا لیڈروں کے گھر اور ٹھکانوں پر چھاپہ ماری کو لے کر سنجے راؤت نے کہا تھا کہ مجھے لگتا ہے کہ صرف مہاراشٹر میں آمدنی اور ٹیکس ہے اور بی جے پی حکمراں ریاستوں میں کوئی آمدنی اور ٹیکس نہیں ہے۔ میونسپل کارپوریشن انتخاب یہاں ہیں... اس لیے مرکزی ایجنسیوں کے پاس صرف مہاراشٹر اور مغربی بنگال میں کام ہے، بقیہ ہندوستان میں کوئی کام نہیں۔

سنجے راؤت نے نائب صدر ونکیا نائیڈو کے ساتھ ساتھ راہل گاندھی، شرد پوار سمیت کئی لیڈروں کو خط لکھا ہے۔ اپنے خط میں شیوسینا لیڈر نے اس بات کا تذکرہ کیا ہے کہ کچھ وقت پہلے کچھ لوگوں نے ان سے مہاراشٹر حکومت گرانے کو لے کر رابطہ کیا تھا، تاکہ مہاراشٹر میں وسط مدتی انتخاب ہو سکے جس پر سنجے راؤت نے انھیں صاف انکار کیا۔

دراصل ای ڈی کی ٹیم نے گزشتہ ہفتہ سنجے راؤت کی بیٹیوں کے پارٹنر سجیت پاٹکر کے گھر چھاپہ ماری کی تھی۔ تقریباً 1034 کروڑ روپے کے زمین گھوٹالے کے معاملے میں سجیت پاٹکر کے احاطوں پر چھاپہ ماری کے بعد سنجے راؤت کی بیٹیاں ای ڈی کی جانچ کے دائرے میں آ گئی ہیں۔ سجیت پاٹکر راؤت کی بیٹیوں کے کمرشیل شراکت دار ہیں۔