سیکورٹی، روزگار نے یوپی کی معیشت کو نئی جہت دی ہے: مودی

بستی: وزیر اعظم نریندر مودی نے امن و امان و ترقی کے لئے ریاست یوپی کی تعریف کرتے ہوئے کہا کہ سیکورٹی اور روزگار کی مشترکہ قوت نے یوپی کی معیشت کو نئی جہت دی ہے۔ اس سے روزگار، کاروبار اور سرمایہ کاری کے نئے مواقع پیدا ہوئے ہیں۔ آج اتر پردیش امن و امان اور ترقی کے رجحان کے لیے پہچانا جاتا ہے، جو مافیا کی سابقہ تصویر اور امن و امان کی تباہ حال صورتحال سے بہت دور ہے۔

اترپردیش کے نو منتخب سب انسپکٹروں کو ویڈیو کانفرنسنگ کے ذریعہ سے خطاب کرتے ہوئے انہوں نے کہا کہ آج 9 ہزار خاندانوں کو خوشی ملے گی اور اس سے اتر پردیش میں تحفظ کا احساس بڑھے گا، کیونکہ نئی بھرتیوں سے ریاست میں پولیس فورس مضبوط ہوگی۔ وزیر اعظم نے کہا کہ 2017 سے یوپی پولیس میں 1.5 لاکھ سے زیادہ نئی تقرریوں کے ساتھ، موجودہ نظام کے تحت ملازمت اور سیکورٹی دونوں میں بہتری آئی ہے۔

ضلع بستی کے پولیس لائن آڈیٹوریم میں ریاست کے 9055 نو منتخب سب انسپکٹروں کو ویڈیو کانفرنسنگ کے ذریعہ سے خطاب کرتے ہوئے وزیر اعظم نے امیدواروں کو مبارک باد پیش کی اور اس بات پر خوشی کا اظہار کیا کہ انہیں تقریباً ہر ہفتے بی جے پی کی حکومت والی ریاستوں میں روزگار میلہ سے خطاب کرنے کا موقع مل رہا ہے اور ملک کو مسلسل بہت سے باصلاحیت نوجوان مل رہے ہیں جو سرکاری نظام میں نئی سوچ اور استعداد پیدا کریں گے۔

وزیر اعظم نے تقرری کا لیٹر حاصل کرنے والے امیدواروں کو مخاطب کرتے ہوئے ان سے نئے چیلنجز اور ذمہ داریوں کے بارے میں بات کی اور کہا کہ وہ اپنے آپ میں آموزگار کو زندہ رکھیں۔ اپنی شخصیت کی نشوونما، ترقی اور علم پر کام کرتے رہیں۔ سیکورٹی اور معاشرے کو سمت دینے دونوں کی ذمہ داری ہوگی۔ ’آپ لوگوں کی خدمت اور طاقت دونوں کے عکاس ہو سکتے ہیں‘۔

انہوں نے کہا جب آپ اس سروس میں آتے ہیں تو آپ کو پولیس کی طرف سے ایک 'ڈنڈا' ملتا ہے، لیکن بھگوان نے آپ کو ایک دل بھی دیا ہے۔ اسی لیے آپ کو حساس بھی ہونا چاہیے اور نظام کو بھی حساس بنانا ہوگا‘‘ انہوں نے تربیت پر بھی زور دیا جس سے اسمارٹ پولیسنگ کو فروغ دینے کے لیے سائبر کرائم، فورینسک سائنس، جیسے جدید شعبوں میں حساسیت میں بہتری آئے گی۔

ڈبل انجن والی حکومت کی کوششوں پر روشنی ڈالتے ہوئے، وزیر اعظم نے نئے ہوائی اڈوں، مال بردار راہداری، نئے دفاعی راہداری، نئے موبائل مینوفیکچرنگ یونٹس، جدید آبی گزرگاہوں، ایک نئے بنیادی ڈھانچے کا ذکر کیا جو روزگار کے غیر معمولی مواقع فراہم کر رہی ہے۔ یوپی میں سب سے زیادہ ایکسپریس وے ہیں اور شاہراہوں کو مسلسل فروغ دیا جا رہا ہے۔ یہ نہ صرف روزگار پیدا کر رہے ہیں بلکہ ریاستوں میں مزید پروجیکٹوں کی راہ ہموار کر رہے ہیں۔

حال ہی میں ریاست میں ہوئے گلوبل انوسٹر سمٹ کے حوالے سے پرجوش ردعمل کا بھی ذکر کیا اور اس پر بھی زور دیا کہ کس طرح اس سے ریاست میں روزگار میں اضافہ ہوگا۔ انہوں نے مدرا اسکیم، ون ڈسٹرکٹ ون پروڈکٹ اسکیم، پھلتے پھولتے ایم ایس ایم ای اور متحرک اسٹارٹ اپ ایکو سسٹم کے تحت 10 لاکھ روپے تک کے ضمانت کے بغیر قرضوں کی مثال پیش کی۔