اتر پردیش: سپریم کورٹ کی ہدایت کے بعد جیلوں سے تقریباً 10 ہزار قیدی رِہا

اتر پردیش کی جیلوں میں بند سزا کاٹ رہے اور زیر غور 10 ہزار سے زائد قیدیوں کو یا تو عبوری ضمانت مل گئی ہے یا پیرول پر رِہا کر دیا گیا ہے۔ ایسا کووڈ وبا کی دوسری لہر کے پیش نظر کیا گیا ہے تاکہ زیادہ بھیڑ بھاڑ والی جیلوں میں بھیڑ کم ہو سکے۔ سپریم کورٹ کی ہدایت کے بعد یہ کارروائی عمل میں آئی ہے۔ محکمہ جیل کے ترجمان کے مطابق 8463 زیر غور قیدیوں کو ضمانت پر رِہا کیا گیا ہے، جب کہ 1660 قصورواروں کو 6 ہفتہ کی پیرول دی گئی ہے۔ 71 مرکزی اور ریاستی جیلوں سے رہِا کیے گئے کل 10123 قیدیوں میں سے بیشتر 704 زیر غور قیدی غازی آباد ضلع جیل سے، علی گڑھ جیل سے 445، لکھنؤ سے 398 اور گوتم بدھ نگر سے 397 قیدی عبوری ضمانت پر رِہا ہوئے ہیں۔ یہاں قابل ذکر ہے کہ ریاست بھر کی جیلوں میں اس وقت ایک لاکھ سے زائد قیدی بند ہیں۔

جیل ڈیپارٹمنٹ 54 غیر مستقل جیلوں کے ساتھ آیا تھا، جہاں نئے معاملوں میں گرفتار مشتبہ افراد کو مستقل جیلوں میں لے جانے سے پہلے 14 دنوں کے لیے چھوڑ دیا جاتا ہے۔ ڈیپارٹمنٹ نے ایک بیان میں کہا کہ 45 سال سے زیادہ عمر کے 24 ہزار سے زائد قیدیوں کو ٹیکہ لگایا گیا ہے۔ اس سے قبل الٰہ آباد ہائی کورٹ کے کارگزار چیف جسٹس جسٹس سنجے یادو، ایڈیشنل چیف سکریٹری (داخلہ) اونیش کمار اوستھی اور ریاست کے ڈائریکٹر جنرل (جیل) آنند کمار کی ایک اعلیٰ اختیار یافتہ کمیٹی نے سپریم کورٹ کی ہدایت پر عمل کرنے کے لیے اہل قیدیوں کی فہرست طلب کی تھی۔