صفیہ کی معصوم بیٹی تھی بھوکی، ٹرین کھلی تو آر پی ایف جوان نے دودھ لے کر لگا دی دوڑ

کورونا بحران کے دور میں آہ و بقا کرتی ہوئی اور مسائل سے نبرد آزما لوگوں کی سینکڑوں تصویریں تو روزانہ سامنے آتی ہی رہتی ہیں، لیکن اس درمیان کئی خوش کن لمحات کی تصویریں بھی سامنے آ جاتی ہیں جنھیں دیکھ کر ایک سکون کا احساس ہوتا ہے۔ ایسا ہی ایک واقعہ بھوپال سے گزرتی ایک شرمک ٹرین میں دیکھنے کو ملا۔ اس گاڑی میں سوار تین ماہ کی بچی بھوکی تھی اور اس کی بھوک مٹانے کے لیے آر پی ایف جوان دودھ لینے اسٹیشن سے باہر گیا اور پھر ٹرین چل دی، ایسے میں جوان نے دودھ کا پیکٹ بچے کی ماں تک پہنچانے کے لیے اپنا پورا زور لگا دیا۔ اس واقعہ کا ویڈیو وزیر ریل پیوش گویل نے اپنے ٹوئٹر ہینڈل سے شیئر کیا ہے جس میں لکھا ہے کہ "ایک ہاتھ میں رائفل اور ایک ہاتھ میں دود۔ کس طرح انڈین ریلوے نے اوسین بولٹ کو پچھاڑا۔"

واقعہ بھوپال ریلوے اسٹیشن کا ہے۔ شرمک ٹرین کرناٹک کے بیلگاؤں سے گورکھپور جا رہی تھی۔ اس میں صفیہ اپنی تین ماہ کی بچی کے ساتھ سفر کر رہی تھی۔ وہ جب گاڑی میں سوار ہوئی تو بچی کے لیے دودھ رکھنا بھول گئی۔ بچی دو دن سے بھوکی تھی۔ بھوپال ریلوے اسٹیشن پر آر پی ایف جوان اندر سنگھ یادو کو صفیہ نے بچی کے لیے دودھ لانے کی گزارش کی۔

آر پی ایف جوان اندر یادو صفیہ کی گزارش پر اسٹیشن سے باہر دودھ لینے کے لیے گیا۔ جب وہ لوٹا تو گاڑی چل چکی تھی۔ یہ دیکھ کر اندر اس کوچ کی طرف دوڑا جس میں صفیہ سوار تھی۔ وہ اپنی کوشش میں کامیاب رہا۔ ایک ہاتھ میں رائفل اور دوسرے میں دودھ لیے اندر کی بھاگتے ہوئے تصویر پلیٹ فارم پر لگے سی سی ٹی وی میں قید ہو گئی۔ اندر کی یہ کوشش ضرورت مند کی مدد کا پیغام دینے والی ہے۔