رامپور ضمنی انتخاب: سماجوادی پارٹی نے مسلمانوں کا استعمال بریانی میں تیزپتا کی طرح کیا! یوپی کے نائب وزیر اعلیٰ کا بیان

لکھنؤ: اتر پردیش کے نائب وزیر اعلیٰ اور بی جے پی کے لیڈر برجیش پاٹھک نے کہا ہے کہ سماجوادی پارٹی کی حکومت نے مسلم طبقہ کو بریانی کے تیزپتا کی طرح استعمال کیا ہے۔ ہفتہ کے روز رامپور میں پسماندہ طبقہ کے ایک جسلہ سے خطاب کرتے ہوئے پاٹھک نے کہا ’’سماجوادی پارٹی اور بی ایس پی وغیرہ نے ووٹ لینے کے لئے ہندووں اور مسلمانوں کے درمیان غلط تشہیر کو فروغ دیا۔

خیال رہے کہ سماجوادی پارٹی لیڈر اعظم خان کے گڑھ والی رامپور اسمبلی سیٹ ان کو نااہل قرار کئے جانے کے بعد خالی ہو گئی ہے۔ پاٹھک نے کہا، "اپوزیشن نے صرف ووٹ حاصل کرنے کے لیے ہندوؤں اور مسلمانوں کے درمیان گہری خلیج پیدا کر دی ہے۔ بی جے پی حکومت نے ایسا کوئی فیصلہ نہیں کیا ہے، جس میں پسماندہ برادری کے لوگوں کو باہر رکھا جائے، انہیں بی جے پی میں شامل کیا جائے، تاکہ آپ کو ہر اسکیم کا فائدہ حاصل ہو سکے۔

پچھلی حکومتوں پر نشانہ لگاتے ہوئے انہوں نے کہا کہ 2017 سے پہلے ریاست کی حالت کیا تھی اور اس کے بعد اس میں کیسے تبدیلی آئی، اس سے سب واقف ہیں۔ انہوں نے کہا کہ پہلے تھانے مافیا اور ڈاکوؤں کے قبضے میں تھے۔ بی جے پی نے ایک بار پھر ریاست میں قانون کی حکمرانی قائم کی ہے اور لکھنؤ کے دروازے رامپور کے لوگوں کے لیے ہمیشہ کھلے ہیں۔

لوگوں کو خبردار کرتے ہوئے کہ دوسری پارٹیوں کے لیڈر انتخابات سے پہلے لوگوں میں غلط معلومات پھیلانے کی کوشش کریں گے، پاٹھک نے کہا کہ وزیر اعظم نریندر مودی واحد لیڈر ہیں جنہوں نے 'سب کا ساتھ، سب کا وکاس اور سب کا وشواس' کا نعرہ دیا ہے۔

پاٹھک نے کہا، ’’بی جے پی کی ڈبل انجن والی حکومت نے بغیر کسی تفریق کے سب کے لیے کام کیا ہے۔ آپ سب کو رامپور کا چہرہ بدلنے میں اپنا حصہ ڈالنے کے لیے آگے آنا چاہیے۔‘‘ خیال رہے کہ رامپور اسمبلی سیٹ پر 5 دسمبر کو ضمنی انتخاب ہونا ہے۔