’راج ٹھاکرے کو ایودھیا میں گھسنے نہیں دوں گا‘، بی جے پی رکن پارلیمنٹ کی تنبیہ

بی جے پی رکن پارلیمنٹ برج بھوشن سنگھ نے راج ٹھاکرے پر شمالی ہند کے باشندوں کو بے عزت کرنے کا الزام عائد کرتے ہوئے معافی کا مطالبہ کیا ہے، بغیر اس کے ایودھیا کی سرحد میں نہ گھسنے کی تنبیہ بھی کی گئی ہے

راج ٹھاکرے اور برج بھوشن سنگھ
راج ٹھاکرے اور برج بھوشن سنگھ
user

قومی آوازبیورو

اتر پردیش میں بی جے پی رکن پارلیمنٹ برج بھوشن شرن سنگھ نے مہاراشٹر نونرمان سینا کے چیف راج ٹھاکرے کو ایودھیا میں نہیں گھسنے دینے کا اعلان کیا ہے۔ برج بھوشن نے کہا ہے کہ ایودھیا آنے سے پہلے راج ٹھاکرے کو شمالی ہند کے باشندوں سے ہاتھ جوڑ کر معافی مانگنی ہوگی۔ انھوں نے ساتھ ہی وزیر اعلیٰ یوگی آدتیہ ناتھ کو بھی مشورہ دیا ہے کہ جب تک راج ٹھاکرے معافی نہ مانگ لیں، ان سے ملاقات نہیں کی جانی چاہیے۔

بی جے پی رکن پارلیمنٹ برج بھوشن کا کہنا ہے کہ رام مندر تحریک سے ٹھاکرے فیملی کا کوئی لینا دینا نہیں ہے۔ راج ٹھاکرے 5 جون کو ایودھیا میں رام للا کا دَرشن کرنے کے لیے آنے والے ہیں، لیکن اس سے پہلے انھیں شمالی ہند کے لوگوں سے معافی مانگنی چاہیے۔ معافی کا مطالبہ برج بھوشن نے اس لیے کیا ہے کہ راج ٹھاکرے کئی بار شمالی ہند والوں کے خلاف بیان دے چکے ہیں۔


خبر رساں ایجنسی اے این آئی سے بات کرتے ہوئے قیصر گنج سے بی جے پی رکن پارلیمنٹ برج بھوشن نے راج ٹھاکرے پر شمالی ہند کے باشندوں کو بے عزت کرنے کا الزام عائد کیا اور کہا کہ راج ٹھاکرے کو اپنے عمل کے لیے معافی مانگنی چاہیے۔ انھوں نے یہ بھی کہا کہ ’’بغیر معافی شمالی ہندوستانیوں کو بے عزت کرنے والے راج ٹھاکرے کو ایودھیا کی سرحد میں گھسنے نہیں دوں گا۔ ایودھیا آنے سے پہلے سبھی شمالی ہندوستانیوں سے راج ٹھاکرے ہاتھ جوڑ کر معافی مانگیں۔‘‘

برج بھوشن شرن سنگھ کا کہنا ہے کہ ’’ہم 2008 سے دیکھ رہے ہیں، انھوں نے ’مراٹھی مانش‘ کے ایشو کو سامنے رکھا، لیکن ممبئی کی ترقی میں 80 فیصد تعاون ان لوگوں کا ہے جو ممبئی شہر سے نہیں ہیں۔ انھیں اپنی غلطی سدھارنی چاہیے۔‘‘

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔