کسانوں کو بے عزت کرنے والا کبھی ’دیش بھکت‘ نہیں ہو سکتا: راہل گاندھی

نئی دہلی: کانگریس صدر راہل گاندھی نے مودی حکومت پر کسانوں کو نظر انداز کرنے کا الزام عائد کرتے ہوئے اتوار کو کہا کہ کسانوں کی بے عزتی کرنے والا کبھی دیش بھکت نہیں ہوسکتا۔ راہل گاندھی نے وزیراعظم نریندرمودی کو ہدف تنقید بناتے ہوئے اپنے سوشل میڈیا سائٹ پر اپنا یہ نظریہ بیان کیا۔ انھوں نے لکھا کہ ’’آپ کی ناکامیابی آپ کی ہے۔ اس کی سزا آپ کسانوں کو کیوں دے رہے ہیں۔ ہمارے کسان ہمیں زندگی دیتے ہیں ان پر کیا گیا ظلم ملک پر کیا گیا ظلم ہے۔ ہندوستان کے کسانوں کو نظرانداز کرنے والا کبھی دیش بھکت نہیں ہوسکتا ہے۔‘‘

اس سے قبل کانگریس جنرل سکریٹری پرینکا گاندھی وڈرا نے بھی کسانوں پر ہو رہے مظالم کے خلاف ٹوئٹر پر اپنی بات رکھی تھی۔ انھوں نے کہا تھا کہ اترپردیش حکومت کو گنا کسانوں کی کوئی فکر نہیں ہے جس کی وجہ سے کسانوں کے بچوں کو تعلیم اور کھانا نہیں مل رہا ہے اور ان کی اگلی فصل بھی خراب ہورہی ہے۔ محترمہ وڈرا نے ٹوئٹر پر کہا تھا کہ ’’گنا کسانوں کے خاندان دن رات محنت کرتے ہیں مگر اترپردیش حکومت ان کی ادائیگی کی بھی ذمہ داری نہیں لیتی ہے۔ کسانوں کا دس ہزار کروڑ روپے کا بقایہ کا مطلب ان کے بچوں کی تعلیم، کھانا، صحت اور اگلی فصل سب کچھ تعطل کا شکار ہوجاتا ہے۔ یہ چوکیدار صرف امیروں کی ڈیوٹی کرتے ہیں، غریبوں کی انہیں کوئی پروانہیں ہے۔‘‘ قابل ذکر ہے کہ پرینکا گاندھی مشرقی اترپردیش سے متعلق معاملوں کی انچارج ہیں اور علاقے میں پارٹی کی انتخابی مہم میں زور وشور سے لگی ہوئی ہیں۔