خوشخبری! زرعی قوانین کے مقابلے پنجاب حکومت لائے گی نیا قانون
پنجاب کی کانگریس حکومت نے مودی حکومت کے ذریعہ پاس کردہ زرعی قوانین کے مقابلے میں ایک نیا قانون لانے کے لیے 19 اکتوبر کو پنجاب اسمبلی کا خصوصی اجلاس بلانے کا فیصلہ کیا ہے۔
پنجاب کی کانگریس حکومت نے بدھ کے روز ایک بڑا فیصلہ لیتے ہوئے مرکزی حکومت کے نئے متنازعہ زرعی قوانین کے مقابلے ایک نیا قانون لانے کے لیے 19 اکتوبر کو پنجاب اسمبلی کا خصوصی اجلاس بلانے کا فیصلہ کیا ہے۔ پنجاب کے وزیر اعلیٰ دفتر نے بتایا کہ وزیر اعلیٰ امرندر سنگھ کی صدارت میں آج ہوئی کابینہ میٹنگ میں اس سلسلے میں فیصلہ لیا گیا۔
اس کے علاوہ امرندر حکومت نے ایک اور بڑا فیصلہ لیتے ہوئے ریاست میں سرکاری ملازمتوں میں خواتین کو 33 فیصد ریزرویشن دینے کا اعلان کیا ہے۔ اس کے لیے حکومت نے پنجاب سول سروس (ریزرویشن آف پوسٹس فار ویمن) ایکٹ 2020 کو منظوری دے دی تاکہ عہدوں پر سیدھی بھرتی کے لیے خواتین کو ریزرویشن دیا جا سکے۔ خود وزیر اعلیٰ کیپٹن امرندر سنگھ نے ٹوئٹ کر اس کی جانکاری دی۔ انھوں نے کہا کہ "آج کا دن پنجاب کی خواتین کے لیے تاریخی ہے۔ کابینہ نے سرکاری ملازمتوں میں خواتین کو 33 فیصد ریزرویشن دینے کا فیصلہ لیا ہے۔"
اس کے ساتھ ہی امرندر حکومت نے آج ہوئی کابینہ میٹنگ میں ڈاکٹر بی آر امبیڈکر ایس سی پوسٹ میٹرک اسکالرشپ اسکیم کو بھی منظوری دے دی۔ سال 22-2021 سے نافذ ہونے والے اس منصوبہ کے لیے زیادہ سے زیادہ آمدنی کا دائرہ بھی ڈھائی لاکھ سے بڑھا کر 4 لاکھ روپے کر دیا گیا ہے۔ ساتھ ہی پنجاب کابینہ نے جھگی جھونپڑیوں میں رہنے والوں کو اراضی کا مالکانہ حق دینے کے لیے پنجاب سلم ڈویلرس (مالکانہ حق) ایکٹ 2020 کے شرائط کو نوٹیفائیڈ کرنے کی منظوری دے دی ہے۔
یہ بھی پڑھیں : کب ہم کھل کھیل کر چھینک پائیں گے… سید خرم رضا
کابینہ میٹنگ میں امرندر سنگھ کی کابینہ نے اسٹیٹ روزگار منصوبہ 22-2020 کو بھی منظوری دے دی ہے جس کے تحت سال 2022 تک ریاست کے ایک لاکھ سے زیادہ نوجوانوں کو روزگار دینے کا کام کیا جائے گا۔ اس منصوبہ کے تحت سرکاری محکموں میں خالی پڑے عہدوں پر مہم چلا کر تیزی سے تقرریاں کی جائیں گی۔ وزیر اعلیٰ امرندر سنگھ نے مرحلہ وار طریقے سے سال 22-2021 تک 1 لاکھ ملازمتیں دینے کا بھی وعدہ کیا ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔