مہاراشٹر میں سنیما گھروں کو بند کرنے کی پیش رفت شروع، عرضی بمبئی ہائی کورٹ میں داخل

کورونا وبا نے کئی صنعتوں کو بری طرح متاثر کیا ہے اور اس میں فلم انڈسٹری بھی شامل ہے۔ اس کی تازہ مثال مہاراشٹر کے ضلع کولہاپور میں اس وقت دیکھنے کو ملی جب کورونا وبا کی وجہ سے بند سنیما گھروں کو مستقبل میں چلا پانے کی ہمت نہ کرتے ہوئے مالکان نے سنگل اسکرین کو بند کرنے کا فیصلہ کر لیا ہے۔ اس تعلق سے سنیما گھروں کے مالکان نے بمبئی ہائی کورٹ میں ایک عرضی بھی داخل کر دی ہے۔

میڈیا ذرائع سے موصول ہو رہی خبروں کے مطابق کولہاپور ڈسٹرکٹ سنے ایگزیبیٹرس ایسو سی ایشن کے صدر سوریہ کانت پاٹل-بدھیہلکر نے ایک پریس ریلیز جاری کیا ہے جس میں کہا ہے کہ حکومت کے شرائط کے مطابق اگر قدیم سنیما گھر گر بھی جاتا ہے تو سنیما گھر کے علاوہ کوئی دوسرا کاروبار نہیں کیا جا سکتا ہے، ان شرائط کے ساتھ تھیٹر کو جاری رکھنا ممکن نہیں ہے۔ لہٰذا تھیٹر مالکان نے بمبئی ہائی کورٹ میں ایک عرضی دائر کر کے ریاست میں عارضی طور پر بند اسکرین مووی تھیٹروں کو ہمیشہ کے لیے بند کرنے کی اجازت دینے کا مطالبہ کیا ہے۔

پاٹل-بُدھیہالکر نے کہا ساتھ ہی کہا ہے کہ ریاست میں کورونا وبا پھیلنے کے بعد گزشتہ ڈیڑھ برس سے تمام سنیما گھر بند کر دیے گئے ہیں لیکن تھیٹر اہلکاروں کی تنخواہ، ٹیکس اور دیگر اخراجات نہیں رکے ہیں جبکہ یہ ڈیلی ویج مالکان کے لیے ناقابل برداشت ہے۔ اس بنیاد پر عدالت کو سنیما گھروں کو بند کرنے کی اجازت دینی چاہیے۔ انہوں نے مزید کہا کہ ریاست کے کل 450 سنگل اسکرین مووی تھیٹر میں سے 50 فیصد تھیٹرکے بند ہونے کا امکان ہے اور اگر عوام سنگل اسکرین مووی تھیٹر میں فلم دیکھنے نہیں آئے تو مووی تھیٹر جاری رکھنے کا کوئی مطلب نہیں ہے۔

جاری ریلیز کے مطابق عوام اب ملٹی پلیکس سنیما گھروں کو ترجیح دے رہے ہیں، جہاں فلموں کو منتخب کرنے کا آپشن ہے کہ کون سی فلم دیکھنی ہے۔ اس میں یہ بھی کہا گیا ہے کہ حکومت نے منظوری دے دی ہے کہ پرانے سنیما گھروں کے گرنے کے باوجود کسی دیگر کاروبار کے لیے کوئی اجازت نہیں ہے تو اس طرح کی حالت میں سنیما گھروں سے اہلکاروں کی تنخواہ کی ادائیگی ممکن نہیں ہے۔