مظلومین کے ساتھ کھڑا ہونا میرا فرض، پرینکا نے کی اعظم گڑھ کے زخمی مظاہرین سے ملاقات

لکھنؤ: کانگریس کی جنرل سکریٹری پرینکا گاندھی آج اعظم گڑھ پہنچ گئی ہیں، جہاں وہ شہریت ترمیمی قانون کے خلاف منعقدہ ریلی میں پولیس کے ذریعہ کی گئی مار پیٹ میں زخمی ہونے والے مظاہرین سے ملاقات کی۔ پرینکا گاندھی نے بدھ کے روز وارانسی کا دورہ کیا جہاں پارٹی رہنماؤں اور کارکنان نے ان کا زبردست استقبال کیا۔ پرینکا گاندھی یہاں سے اعظم گڑھ روانہ ہوگئیں تھیں۔

اعظم گڑھ روانہ ہونے سے پہلے پرینکا گاندھی وارانسی کے لال بہادر شاستری ہوائی اڈے پر پہنچیں۔ یہاں سے وہ سڑک کے ذریعہ اعظم گڑھ کے لئے روانہ ہوئیں۔ کانگریس کارکنوں نے وارانسی اور اعظم گڑھ میں ان کا استقبال کیا۔

پرینکا گاندھی کے ساتھ بڑی تعداد میں مسلم خواتین بھی موجود رہیں جو احتجاج کے دوران پولیس کارروائی پر سراپا احتجاج بنی ہوئی ہیں۔ متاثرین نے پرینکا گاندھی کو اپنی آپ بیتی سنائی۔ واضح رہے کہ 5 فروری کو اعظم گڑھ میں سی اے اے-این آر سی کے خلاف احتجاج کرنے والی خواتین پر پولیس نے تشدد کیا۔ پولیس نے بھیڑ کو منتشر کرنے کے لئے لاٹھی چارج کیا تھا۔

قبل ازیں، ملک بھر میں شہریت ترمیمی قانون کے خلاف احتجاج پر کانگریس کی جنرل سکریٹری پرینکا گاندھی نے ٹوئٹ کیا، ’’جمہوریت میں آواز اٹھانا جرم نہیں ہے اور میرا فرض ہے کہ ان لوگوں کے ساتھ کھڑی ہوؤں جن پر ظلم کیا جا رہا ہے۔‘‘

پرینکا گاندھی کا اعظم گڑھ کے بلریا گنج جاتے وقت کانگریس کیمپ دفتر جوگیا پور کے نزدیک پارٹی کارکنوں نے زبردست ان کا استقبال کیا۔ اس دوران صحافیوں سے اپنی مختصر بات چیت میں کہا کہ معیشت پر بی جے پی حکومت کو سب سے زیادہ دھیان دینا چاہیے تھا لیکن معیشت میں بہتری کا معاملہ ٹھنڈے بستے میں بند کر دیا گیا ہے۔ جی ڈی پی کے اندازے بتاتے ہیں کہ حالات ٹھیک نہیں ہیں۔

انہوں نے کہا کہ جی ڈی پی میں لگاتار گراوٹ آرہی ہے اور اس بار بھی گراوٹ کا ہی اندازہ ہے۔ انہوں نے کہا کہ اس کا سب سے زیادہ اثر تجارت، غریبوں، دہاڑی پر کام کرنے والے مزدوروں اور روزگار پر پڑ رہا ہے۔ جبکہ حکومت کی طرف سے کوئی بھی تسلی بخش اقدام نہیں کیا جا رہا ہے۔

غور طلب ہے کہ پورے ملک میں سی اے اے کے خلاف مظاہرے ہو رہے ہیں اور لوگ مرکزی حکومت سے سی اے اے واپس لینے کا مطالبہ کر رہے ہیں۔ پولیس نے متعدد مقامات پر مظاہرین پر ظلم و بربریت کی ہے اور لاٹھی چارج میں بہت سے افراد زخمی بھی ہوئے ہیں۔ اعظم گڑھ میں بھی سی اے اے کی شدید مخالفت کی جا رہی ہے۔ احتجاج کے دوران پولیس نے مظاہرین کو زدوکوب کیا، جس سے متعدد افراد زخمی ہوگئے۔ پرینکا گاندھی انہیں متاثرین سے ملاقات کی ہے۔

اتر پردیش میں سی اے اے کے خلاف سب سے زیادہ مظاہرے ہوئے ہیں اور ان میں 19 مظاہرین ہلاک ہو گئے۔ پولیس نے متعدد افراد کو گرفتار کر کے جیل میں بھی بند کر دیا۔ کانگریس پارٹی سی اے اے کے خلاف ہے اور پرینکا گاندھی مظاہرین پر ہونے والے ظلم و ستم کے خلاف مسلسل آواز اٹھا رہی ہیں۔