’اندرا گاندھی کی پوتی ہوں، بی جے پی کی غیر اعلانیہ ترجمان نہیں‘

اتر پردیش کے کانپور شیلٹر ہوم میں کئی بچیوں کے کورونا متاثر پائے جانے کے بعد ایک ہنگامہ برپا ہو گیا ہے۔ اس معاملے میں تحفط حقوق اطفال کمیشن کے ذریعہ پرینکا گاندھی کو نوٹس بھیجے جانے کے بعد کانگریس جنرل سکریٹری نے جمعہ کو ایک ٹوئٹ کر کے طنز کسا ہے۔ انھوں نے ٹوئٹ میں لکھا ہے کہ "میں اندرا گاندھی کی پوتی ہوں، کوئی غیر اعلانیہ بی جے پی ترجمان نہیں۔"

پرینکا گاندھی نے اپنے ٹوئٹ کے ذریعہ ریاستی حکومت کو تنقید کا نشانہ بناتے ہوئے لکھا ہے کہ "عوامی خدمت گار کے طور پر میری جو ذمہ داری ہے اسے پورا کرتی رہوں گی، اور وہ ذمہ داری ہے سچائی کو عوام کے سامنے رکھنے کی۔ کسی سرکاری پروپیگنڈہ کو آگے رکھنا میرا کام نہیں ہے۔ یو پی حکومت اپنے دیگر محکموں کے ذریعہ مجھے فضول کی دھمکیاں دے کر اپنا وقت برباد کر رہی ہے۔"

اپنے ٹوئٹ میں پرینکا گاندھی آگے لکھتی ہیں کہ "جو بھی کارروائی کرنا چاہتے ہیں، بے شک کریں۔ میں سچائی سامنے رکھتی رہوں گی۔ میں اندرا گاندھی کی پوتی ہوں، کچھ اپوزیشن کے لیڈروں کی طرح بی جے پی کی غیر اعلانیہ ترجمان نہیں۔"

قابل ذکر ہے کہ کانپور کے گرلس شیلٹر ہوم میں 17 سے 19 جون کے درمیان 57 لڑکیاں کورونا پازیٹو ملی تھیں۔ ان میں 5 لڑکیاں حاملہ تھیں اور ایک ایچ آئی وی بھی تھی جب کہ ایک دیگر لڑکی ہپاٹائٹس سے متاثر تھی۔ اس واقعہ کو پرینکا گاندھی نے دیوریا اور مظفر پور شیلٹر ہوم واقعہ سے جوڑ کر کہا تھا کہ معاملہ کی غیر جانبدارانہ جانچ ہونی چاہیے۔