پی ایم مودی نے کی کابینہ کمیٹیوں کی تنظیم نو، مانڈویا، اسمرتی اور بھوپندر کی شمولیت

نئی دہلی: مرکزی کابینہ کی توسیع اور تنظیم نو کے بعد وزیراعظم نریندر مودی نے کابینی کمیٹیوں کی تنظیم نو کرتے ہوئے منسکھ مانڈویا، سروانند سونو وال، اسمرتی ایرانی اور بھوپندر یادو جیسے نئے وزراء کو ان میں شامل کیا ہے حالانکہ دفاعی معاملات اور تقرری معاملات جیسی اہم اور حساس کمیٹیوں میں کوئی تبدیلی نہیں کی گئی ہے۔

مرکزی سکریٹریٹ کے نوٹیفکیشن کے مطابق وزیر دفاع راجناتھ سنگھ کی صدارت والی پارلیمانی امور کی کمیٹی میں کپڑا وزیر ارجن منڈا، سماجی انصاف اور امپاورمنٹ کے وزیر ڈاکٹر وریندر کمار، قانون اور انصاف کے وزیر کرن رجیجو اور اطلاعات و نشریات کے وزیر انوراگ ٹھاکر کو رکن بنایا گیا ہے۔ کمیٹی کے پرانے اراکین میں مرکزی وزیر داخلہ امت شاہ، وزیر خزانہ نرملا سیتارمن، وزیر زراعت نریندر سنگھ تومر شامل ہیں۔

وزیراعظم کی صدارت والی سیاسی معاملات کی کمیٹی میں خواتین اور اطفال کی فلاح وبہبود کی وزیر اسمرتی ایرانی، جہاز رانی وزیر سروانند سونووال، وزیر صحت منسکھ مانڈویا اور محنت اور روزگار کے وزیر بھوپندر یادو کو شامل کیا گیا ہے جبکہ وزیر دفاع راجناتھ سنگھ، وزیر داخلہ امت شاہ، روڈ اور ٹرانسپورٹ کے وزیر نتن گڈکری، وزیر خزانہ نرملا سیتا رمن اور وزیر زراعت نریندر سنگھ تومر پہلے سے ہی اس کے رکن ہیں۔

دفاعی امور اور تقرری معاملات کی اہم کمیٹیوں میں کوئی تبدیلی نہیں کی گئی ہے۔ تقرری معاملات کی کمیٹی میں خود وزیراعظم نریندر مودی اور مرکزی وزیر داخلہ امت شاہ دو ہی رکن ہیں۔ دفاعی معاملات کی کمیٹی میں وزیراعظم نریندر مودی، وزیر دفاع راجناتھ سنگھ، وزیر داخلہ امت شاہ، وزیر خزانہ نرملا سیتارمن اور وزیر خارجہ ایس جے شنکر شامل ہیں۔

وزیراعظم نریندر مودی کی صدارت والی اقتصادی معاملا ت کمیٹی میں وزیر دفاع راجناتھ سنگھ، وزیر داخلہ امت شاہ، روڈ اور ٹرانسپورٹ کے وزیر نتن گڈکری، وزیر خزانہ نرملا سیتارمن، وزیر زراعت نریندر سنگھ تومر، وزیر خارجہ ایس جے شنکر، کامرس اینڈ انڈسٹری کے وزیر پیوش گوئل اور وزیرتعلیم دھرمیندر پردھان سمیت نو اراکین ہیں۔ مرکزی وزیر داخلہ امت شاہ کی صدارت والی رہائش سے متعلق کمیٹی میں روڈ اور ٹرانسپورٹ کے وزیر نتن گڈکری، وزیر خزانہ نرملا سیتارمن، کامرس اینڈ انڈسٹری کے وزیر پیوش گوئل اور پٹرولیم کے وزیر ہردیپ سنگھ پوری ہیں۔

سرمایہ کاری اور ڈیولپمنٹ سے متعلق کمیٹی میں ایم ایس ایم ای کے وزیر نارائن رانے، شہری ہوابازی کے وزیر جیوترآدتیہ سندھیا اور ریلوے کے وزیر اشونی ویشنو کو شامل کیا گیا ہے۔ وزیر تعلیم دھرمیندر پردھان، ریلوے کے وزیر اشونی ویشنو، محنت اور روزگار کے وزیر بھوپندر یادو اور رہائش اور شہری امور کے وزیر ہردیپ سنگھ پوری کو روزگار اور ہنرمندی کو فروغ وزارت میں جگہ دی گئی ہے۔ یہ کمیٹیاں مرکزی کابینہ کا حصہ ہوتی ہیں اور دفاع، تقرری، معیشت اور پارلیمانی امور جیسے مختلف موضوعات پر بات چیت کے بعد فیصلہ کرتی ہیں۔