ائیر انڈیا پائلٹوں کی تنخواہ میں 60 فیصد کٹوتی کی تجویز، یونین مینجمنٹ سے ناراض

ائیر انڈیا پائلٹوں کے یونینوں نے کہا ہے کہ مرکزی حکومت کی ہدایت پر ائیر انڈیا مینجمنٹ پائلٹوں کی کارکردگی کی بنیاد پر تنخواہ میں 60 فیصد تخفیف کا منصوبہ بنا رہا ہے۔ اسے دیکھتے ہوئے انڈین کامرشیل پائلٹس ایسو سی ایشن اور انڈین پائلٹس گلڈ نے مشترکہ طور پر الزام عائد کیا ہے کہ یہ منصوبہ کل تنخواہ میں سے 60 فیصد تخفیف کا ہے۔

ائیر انڈیا کے سی ایم ڈی راجیو بنسل کو لکھے خط میں دونوں یونینوں نے کہا ہے کہ "مینجمنٹ کا منصوبہ پائلٹوں کی کل تنخواہ میں 60 فیصد تخفیف کا ہے۔ یہ جاننا اپنے آپ میں انتہائی مضحکہ خیز ہے کہ سرکردہ مینجمنٹ نے اپنی تنخواہ میں محض 3.5 فیصد تخفیف کی تجویز پیش کی ہے۔" خط میں آگے کہا گیا ہے کہ "ڈائریکٹر پرسونل کی تنخواہ میں معمولی 4 فیصد تخفیف ہوئی ہے، تو وہیں ایک اسسٹنٹ پائلٹ کی تنخواہ میں 60 فیصد کی تخفیف کی تجویز پیش کی گئی ہے۔ جب کہ بازار کے مقابلے اسے پہلے سے ہی کم تنخواہ مل رہی ہے۔ یہ کیسے مناسب ہو سکتا ہے؟ کیا یہ لالچ اور مطلب پرستی نہیں ہے؟"

16 جولائی کو لکھے خط میں ائیر لائن مینجمنٹ اور وزارت کے افسروں کے ساتھ کئی دور کی میٹنگوں کا بھی تذکرہ کیا گیا ہے۔ دونوں یونین نے کہا ہے کہ انھوں نے خواہش ظاہر کی تھی کہ بازار کے حساب سے تنخواہ میں تخفیف ہو۔ خط میں یونین نے کہا کہ "آپ نے (بنسل) ہمیں بتایا تھا کہ وزارت نے آپ سے کہا ہے کہ پائلٹ کی تنخواہ میں 60 فیصد کی تخفیف کریں۔ لیکن یہ بازار کے پیمانہ پر کہاں صحیح ٹھہرتا ہے۔"

خط میں پائلٹوں نے آگے کہا "اگر یہ صحیح ہے تو ہم وزیر محترم اور وزیر اعظم سے ملنا چاہتے ہیں اور ملک کی خدمت کے لیے وہ سبھی توصیفی سند لوٹانا چاہتے ہیں جو وقت وقت پر انھوں نے دیے ہیں۔ ان سب کے باوجود اس مشکل وتق میں ہم ملک کی خدمت کرتے رہیں گے۔" دونوں یونینوں نے کہا کہ پائلٹوں کی تنخواہ کا 70 فیصد اپریل 2020 سے ہی نہیں ملا ہے۔

خط میں مزید لکھا گیا ہے کہ "کی جا چکی خدمت پر قبل اثر سے تنخواہ تخفیف پر تبادلہ خیال کرنا غلط اور ایک ملازم کے لیے بے عزتی ہے جو کہ کمپنی اور ملک کے لیے وفادار رہا ہے۔ ہم مطالبہ کرتے ہیں کہ کسی آپسی سمجھوتے پر پہنچنے تک مینجمنٹ ہمارے موجودہ معاہدوں کی عزت کرے۔" پائلٹ یونین نے کہا کہ "ہم آپ کو یاد دلانا چاہتے ہیں کہ کوئی بھی شخص قانون سے اوپر نہیں ہے اور ہم امید کرتے ہیں کہ ائیر انڈیا اور شہری ہوابازی سکریٹری ملک کے قانون کی عزت کریں گے۔"